O'yin haqida

“Andijon” jamoasini Superligaga yo'llanma olishi bilan tabriklasak ham bo'ladi. Jamoa muxlislari “Andijon”ni Superliga, OCHLda ishtirok etishini kuzatishga haqli. Biz ham yo'llanma uchun oxirigacha kurashamiz. Yomg'irli havo bo'lishiga qaramay, muxlislarimiz stadionga kelib, bizni qo'llab-quvvatlashdi. Muxlislarimizga shuni aytmoqchimanki, oxirgi turlarga kelib vaziyatimiz biroz qiyinlashgan bo'lsa-da, biz kurashishda davom etamiz. Maqsadimizga erishamiz.

Ikkinchi bosqchida har bir bahs qiyin kechmoqda. Futbolchilarga ham takidlab o'tganman, bizning oldimizda beshta muhim va finalga teng bahs kutib turibdi deb. “Andijon” bilan ham qiyin va murosasiz kurash kechdi. Mezbonlar gol o'tkazib yuborganidan keyin muvozanatni tiklashga etibor qaratdi. O'yindan oldin standart vaziyatlardan havotirga tushgandik. Baribir mezbonlar yuqoridan kelgan to'p orqali hisobni tenglashtirdi. Mamatkazin xavfli ekanligini bilardik, unga alohida futbolchi biriktirgandik. Futbolchilarimiz o'yin davomida o'zlariga yuklatilgan vazifani bajarishga intilishdi. O'ylaymanki, bugungi o'yindagi futbolchilarimiz yuqori bahoga loyiq.

- O'yindan oldin durang natijaga rozi bo'larmidingiz?

- Gapni ochig'i, oxirgi turlarda g'alaba qozona olmayotganimiz sababli, durang natija mag'lubiyatga teng hisoblanadi. “Andijon” bilan o'yinda g'alaba uchun maydonga tushgandik. Keyingi o'yinimiz “Buxoro”ga qarshi safarda bo'lishidan kelib chiqsak, durang bir ochko keltirdi. “Buxoro” bilan bahs avvalida bizga qo'shimcha ustunlik berdi. Nazarimda, durang o'yinga mos bo'ldi. Oldimizda 4 ta muhim o'yinimiz bor. Yo'qotilgan ochkolarni shu bahslar orqali to'ldirmoqchimiz.

- Zaxiradan maydonga tushganlar jamoa o'yinini qanchalik kuchaytira oldi?

- O'yinga qo'shilganlar yaxshi harakat qilishdi. Ibragimov va Abdunabiev ham. Lekin men murabbiy sifatida ulardan ko'proq narsa kutaman. Balki zaxiradan qo'shilganlar yanada yaxshiroq harakat qilishlari ham mumkin edi.

- “Turon” bosh murabbiyiga aylanganingizdan keyin jamoa ikki marotaba durang qayd etdi. Bunga fikringiz qanday?

- Biz ko'prog'ini kutgandik. Lekin bu futbol. “Turon”ga qarshi o'ynayotgan jamoalar jiddiy harakat qilyapti. O'ylashimcha, biz ikki o'yinda 4 ochko to'plashimiz mumkin edi. “Mashal” bilan bahsda g'alaba qozonsak bo'lardi. Lekin o'sha kuni o'zimiz istagan holat yuz bermadi. “Andijon” maydonida durang o'ynash ijobiy deb hisoblasak bo'ladi. Har holda bu jamoa maydonida durang o'ynash raqiblarga oson bo'lmayapti. “Mashal” bilan bahsdagi natija esa katta yo'qotish deb hisoblayman.

- Pro liga bahslarini ikki bosqichga bo'lib o'tkazilishi qanchalik o'zini oqlaydi?

- Har bir o'yin jangovar va murosasiz kechishi sabab oqlamoqda. Men jamoani qabul qilib olganimda, “Turon” ko'proq ochkolarini kuchli beshtalikdan pastdagilarga qarshi o'yinlarda qo'lga kiritgan. Deylik, “Yangier”, “Aral Samali” va “Zomin” bilan bahslarda ko'proq ochko to'plagan. Yuqoridagi beshlik jamoalariga qarshi o'yinlarda ko'proq ochko yo'qotgan. O'ylaymanki, bu tizim to'g'ri. Har bir o'yin qiziq o'tmoqda.

Baxtiyor Ashurmatov: “Ikki o'yinda 4 ochko to'plashni maqsad qilgandik”