- Baxtiyor aka, bugungi o'yin haqida fikrlaringiz...
- Ochig'ini aytganda ko'pchilik bu turnirda natija muhim emas deb hisoblaydi. Lekin natija har doim muhim bo'lgan. Bugungi o'yin derbi maqomiga mos bo'ldi. "Turon" jamoasi selekciya ishlarini juda yaxshi tarzda olib borayapti, jamoaning tarkibi bir qator tajribali futbolchilar bilan to'ldirilmoqda. Shu sababdan bugungi uchrashuv qiziqarli va kurashlarga boy tarzda o'tdi.

Jamoamiz futbolchilari berilgan ko'rsatmalarni to'liq bajarishdi deb ayta olaman, ular maydonda oxirigacha kurashishdi. O'ylaymanki, futbol muxlislariga bugungi o'yin manzur bo'ldi. Bizning oldimizdagi vazifa - mazkur musobaqada g'oliblikni qo'lga kiritish. "Hokim kubogi" musobaqasida bir qator nomdor klublar ishtirok etmoqda, shu sababli ushbu musobaqa har yilgidan ko'ra qiziqarliroq ruhda kechyapti. Baribir o'yindagi ustunlik ko'proq biz tomonda bo'ldi, balki "Turon" tarkibi yangi shakllanayotganligi uchun futbolchilar jamoa uslubiga moslashib ulgurishmagan. O'ylaymanki, bu jamoa Superligada o'z so'zini aytadi, har qanday raqibga "boshog'riq" bo'ladigan klubga aylanmoqda.

Yigitlarga bugungi o'yin uchun rahmat aytaman. Uzoq yo'l bosib kelib stadionda bizni qo'llab-quvvatlab turgan muxlislarga jamoamiz nomidan minnatdorchilik bildiraman.

- Jamoangiz bugungi o'yinda raqibga nisbatan ko'p qo'pollik ishlatgandek ko'rindi...
- Men bunaqa deb aytmagan bo'lardim. Bugungi o'yin yakkakurashlarga boy tarzda o'tdi. Agar Fozil Musaev jarohat olgan vaziyatni nazarda tutayotgan bo'lsangiz, bu vaziyatda jamoamiz azosi Rustam Abduhamidov futbolchini ko'rgani yo'q edi. U to'pni tepib yuborish uchun sakradi, Musaev boshi bilan o'ynamoqchi bo'lgani oqibatida tasodifiy jarohat yuzaga keldi. Lekin raqiblar tomonidan jamoamiz hujumchisi Mo'min Melievga nisbatan ham bir necha bor ortdan zarbalar berilganini ham etiborga olish kerak. Bu futbol, men hozir u yoki bu jamoa keskin o'ynadi deb aytmagan bo'lardim. Umuman aytganda har ikki jamoa ham jangovor futbol namoyish etdi. Maydon xolati ham bugungi o'yin shunday ruhda o'tishiga sababchi bo'ldi, uchrashuvda ko'proq yakkakurashlar bo'ldi.

- "Qo'qon-1912" musobaqaning navbatdagi bosqichida Anvar Berdiev bosh murabbiyligidagi "Istiqlol" jamoasi bilan to'qnash keladi. Mazkur o'yin haqida fikrlaringiz...
- Anvar Berdiev jamoasi bugun "Buxoro" bilan bahsda PRO-Liga vakili bo'lishiga qaramasdan juda yaxshi o'yin namoyish etdi. O'ylaymanki jamoamiz yigitlari ushbu bahsga masuliyat bilan yondashishadi. Bizni xayolimizda "Istiqlol" PRO-Liga jamoasi degan fikr yo'q, chunki bugun ularning "Buxoro" bilan kechgan o'yinini ko'rib shunga amin bo'ldik. Anvar Berdiev yaxshi jamoa shakllantirmoqda, shu sababli oson o'yin bo'lmaydi.Bu uchrashuv juda qiziqarli va tomoshabop ruhda o'tishiga shubha yo'q.

Bekzod Tolibov yozib oldi

Baxtiyor Ashurmatov: "Natija har doim muhim"