Uchrashuvdan so'ng “Sherdor” klubi bosh murabbiyi Baxtiyor Sattorov o'yin haqida fikrlarini bildirdi.

- Barcha samarqandlik muxlislarni yangi mavsumning boshlanishi va bugungi qiyin va tomoshabop o'yindagi g'alaba bilan tabriklayman. G'alabani muxlislarga bag'ishlaymiz. Bilasiz, “Sherdor” jamoamizning Pro-Ligaga ishtirok etishi malum bo'lganiga bir haftadan ko'proq bo'ldi. Bungacha esa bizning 4 oy davomida Pro-Ligada to'p surish umidida qilgan mehnatlarimiz zoya ketmadi. Bugungi 120 daqiqalik kubok o'yini kamchiliklarimizni ham ko'rsatdi, tarkibimiz yangi mavsumga 90 foiz tayyor, faqat jismoniy jihatdan ish olib borishimiz kerak. Asosiysi mavsumni ko'tarinki ruhda boshlay oldik. Endi Pro-Liga 1-tur o'yiniga ham puxta tayyorgarlikni davom ettiramiz.

- “Sherdor” bugungi penaltilar seriyasiga alohida tayyorgarlik ko'rganmidi?

- Ochig'ini aytsam, 11 metrlik zarbalarga alohida tayyorgarlik ko'rmagandik. Sababi o'yin taqdirini asosiy vaqtda hal etishimiz kerak edi.

- “Sherdor” singari “Labsa” ham Pro-Ligada ilk bor ishtirok etadi. O'yindan oldin bu jamoani o'rganishga ulgurganmidingiz?

- Raqib jamoaning “Mashal” bilan nazorat bahsidagi tarkibini, o'yin uslubini imkon qadar matbuot xizmatimizning malumotlari asosida o'rganishga intilgandik. “Labsa” jamoasi hurmatga sazovor raqib. Tarkibida yosh va tajribali futbolchilar bor ekan.

- “Sherdor”ning bu yilgi maqsad va vazifalari nimalardan iborat?

- Eng asosiy vazifamiz samarqandlik yosh futbolchilarni tarbiyalab, ularga imkoniyat berib, futbolchilarni yangi darajaga olib chiqish hamda imkon qadar Superliga bahslariga yo'llanma olishdir. Buni qanchalik amalga oshirishimizni vaqt ko'rsatadi. Klubimiz rahbariyati bizdan kelajakda barqaror, har yili yaxshi futbolchilarni etkazib beradigan jamoa yaratishimiz talabini qo'ygan. Kubokda bo'lgani kabi, Pro-Liga o'yinlariga ham mahalliy futbolchilarimiz bilan kurashib, muxlislarni xursand etishga bel bog'laganmiz.

Usmon Ibodov yozib oldi.

Baxtiyor Sattorov: Sherdorning maqsadi imkon qadar Superligaga chiqish