Biroq jamoa ilk davraning so'nggi turlarini tarkibda bir qator etakchilarsiz o'tkazishga majbur bo'ldi. Jumladan, jamoaning asosiy himoyachilaridan biri – Islom To'xtaxo'jaev hamda jamoa to'purari – Marat Bikmaev jarohat sabab bir nechta muhim o'yinlarni o'tkazib yuborishdi.

Xo'sh, ushbu ikki futbolchining tiklanish jarayoni qanday ketmoqda? Bu haqida mahoratli o'yinchilar “Lokomotiv” jamoasi matbuot xizmatiga so'zlab berishdi.

JAROHAT XUSUSIDA:

Marat Bikmaev:

Menda gematoma ro'y berdi. Hozirda sekin-asta yakka tartibda mashg'ulot o'tayapman. Jamoa bilan birgalikda chigalyozdi mashqlari bajarayotgan bo'lsak-da, bizda (jarohat olgan futbolchilarda) o'zimizning alohida tiklanish mashg'ulotlari dasturimiz bor. Shu asosda sekin-sekin jarohatdan tiklanib boryapmiz. Hozir oldingidan ancha engillikni his qilyapman. Yaqin orada umumiy guruh mashg'ulotlariga qo'shilishga umid qilyapmiz.

Islom To'xtaxo'jaev:

Men “Qo'qon-1912” jamoasiga qarshi o'yin oldidan tizzamdan jarohat olgan edim. Shukr, jarohatdan tuzalish jarayoni ko'ngildagidek ketyapti. Umid qilamanki, ikkinchi davradan boshlab jamoamizga yana yordam bera boshlaymiz.

“LOKOMOTIV”NING BIRINCHI DAVRADA KO'RSATGAN O'YINI XUSUSIDA:

Marat Bikmaev:

Birinchi davrani biz ancha yaxshi tarzda o'tkaza oldik. Ilk davrani birinchi pog'onada tugatyapmiz. Bu ikkinchi davrada bizga katta ustunlik taqdim etishi tayin. Bunga asosiy sabab esa – chempionatga tayyorgarlik jarayonini ancha puxta olib borgan edik. Ana endi ikkinchi davraga ham shunday yaxshi hozirlik ko'rib, uni ham ko'ngildagidek o'tkazishga urinamiz.

Islom To'xtaxo'jaev:

Birinchi davrani birinchi o'rinda yakunlaganimiz yaxshi bo'ldi, deb o'ylayman. Qishda bo'lgan o'quv-mashg'ulot yig'inlarida qilgan mehnatimiz o'z samarasini mana birinchi davra o'yinlarida ko'rsatdi. To'g'ri, hamma joyda ham qandaydir kamchilik bo'ladi. Ammo uni bartaraf etgan holda ikkinchi davraga ham yaxshi tayyorgarlik olib borib, chempionlik o'rnimizni hech kimga bermaslikka harakat qilamiz.

Bikmaev va To'xtaxo'jaevning jarohatdan qutilish jarayoni qanday ketmoqda? (VIDEOINTERVYU)