Birinchisi, O'zbekiston terma jamoasi nihoyat 10ta o'yinlik g'alabasiz seriyasini yo'qqa chiqardi. Biz oxirgi marta o'tgan yilning 6 iyun sanasida Tailandni 2:0 hisobida mag'lub etgandik. Shundan beri o'nta o'yin o'tkazgan terma jamoamiz birortasida g'alabaga erishga olmagandi.

Oradan bir yildan ko'proq vaqt o'tib kecha vakillarimiz yana g'alaba qozonishdi. Mart oyidan beri endi yig'ilgan KXDR terma jamoasi 2:0 hisobida mag'lub etildi. Shunday qilib O'zbekiston MTJ bir yildan ko'p davom etgan g'alabasiz seriyasiga Ektor Kuper qo'l ostida barham berdi.

Ikkinchi quvonchli xabar shuki, Ektor Kuperning o'zi ham 11ta o'yindan so'ng 12-bahsini g'alaba bilan tugatdi. Statistikaga murojaat qiladigan bo'lsak, bu murabbiy oxirgi 11ta o'yindan beri zafar qucha olmay kelayotgandi. Yaxshi bilasiz, Kuper bizgacha Misr terma jamoasini boshqargan.

U Misr bosh murabbiyi sifatida 2018 yil 8ta o'yin o'tkazib, birortasida g'alaba qozona olmadi. Uning boshchiligida misrliklar JCH-2018dagi uchala uchrashuvda mag'lubiyatga uchraganini yaxshi bilasiz. Kuper oxirgi marta 2017 yilning 8 oktyabrida Kongoni 2:1 hisobida mag'lub etgan. Shundan beri oradan bir yildan sal ko'proq vaqt o'tib u ham ilk g'alabasini nishonladi.

Naqadar bir-biriga mos terma jamoa va murabbiy, to'g'rimi? Argentinalik mutaxassis O'zbekistonga kelgach sentyabr oyida ikkita uchrashuv o'tkazib bunda ham yuta olmagandi. Va nihoyat 13 oktyabr sanasida bo'lib o'tgan KXDRga qarshi bahsda Kuper 11ta o'yinlik g'alabasiz seriyasiga barham berdi.

Ektor Kuperning oxirgi g'alabasidan kechagisiga qadar:

2017 yil
8 oktyabr. Misr - Kongo 2:1 (JCH-2018 saralash)
12 noyabr. Gana - Misr 1:1 (JCH-2018 saralash)

2018 yil
23 mart. Portugaliya - Misr 2:1 (O'rtoqlik uchrashuvi)
27 mart. Misr - Greciya 0:1 (O'rtoqlik uchrashuvi)
25 may. Quvayt - Misr 1:1 (O'rtoqlik uchrashuvi)
1 iyun. Misr - Kolumbiya 0:0 (O'rtoqlik uchrashuvi)
6 iyun. Belgiya - Misr 3:0 (O'rtoqlik uchrashuvi)

15 iyun. Misr - Urugvay 0:1 (JCH-2018 guruh bosqichi)
19 iyun. Rossiya - Misr 3:1 (JCH-2018 guruh bosqichi)
25 iyun. Saudiya Arabistoni - Misr 2:1 (JCH-2018 guruh bosqichi)

6 sentyabr. O'zbekiston - Suriya 1:1 (O'rtoqlik uchrashuvi)
11 sentyabr. O'zbekiston - Eron 0:1 (O'rtoqlik uchrashuvi)
13 oktyabr. O'zbekiston - KXDR 2:0 (O'rtoqlik uchrashuvi)

Bilasizmi? Ektor Kuper 11ta o'yindan so'ng nihoyat g'alabaga erishdi