Vodiy derbisi hammavaqt qizg'in va murosasiz ruhda o'tgan. Bo'lajak to'qnashuv ham shunday o'tishi kutilmoqda. Sababi, peshqadam "Navbahor" va 4-o'rindagi "Neftchi" o'rtasida 4 ochko mavjud. Mezbonlar esa mazkur g'alaba orqali ochkolar tafovutini bittaga qisqartirishi hamda 2-o'rindagi "Nasaf" bilan ochkolari sonini yana tenglashtirib olish imkoniyatiga ega bo'ladi. Bu ham uchrashuvning shiddatli o'tishiga zamin yaratadi.

Bo'lajak o'yin oldidan jamoalar o'rtasidagi gollarga boy bo'lgan 2010 yilgi to'qnashuvni yodga olamiz.

Mavsumning dastlabki davrasida Namanganda kechgan 11-tur bahsi 1:1 hisobida yakunlangan. Ikkinchi davrada esa 16-tur yana ularni bir-biriga ro'baro' qildi.

Mazkur uchrashuv oldidan farg'onaliklar 14 jamoa qatnashayotgan chempionatda 13 ochko bilan 13-o'rinda borayotgandi. Shu bois, xavfli zonadan chiqish uchun ularga g'alaba suv va havodek zarur edi. "Navbahor" esa 18 ochko bilan 8-o'rinda borayotgandi. Ammo mag'lubiyat quyi pog'onalardagi raqobatchilarni o'zidan o'tkazib yuborishiga sabab bo'lishi mumkin edi. Qolaversa, derbi maqomi ham jamoalarning bor kuchi bilan kurashishi lozimligini anglatardi.

Farg'onadagi qarama-qarshilikning 10-daqiqasidayoq Mansur Saidov hisobni ochishga muvaffaq bo'ldi. Taym yakunlanishi arafasida esa Elyor Jahonov hisobni tenglashtirdi. Ammo Alisher Xoliqov 45-daqiqada yana mezbonlarni oldinga olib chiqdi.

Ikkinchi bo'lim ham gollarga yana-da boy bo'ldi. Evgeniy Sayko taym boshida hisobni tenglashtirdi. 54-daqiqada Anvar Berdiev 11 metrli nuqtadan adashmadi. G'ayrat Jo'raev 67-daqiqada uchinchi bor hisobni tenglashtirdi. Sherzod Hakimov o'yin yakunlanishi arafasida to'rtinchi bor jamoasini hisobda oldinga olib chiqdi, biroq namanganliklar bu safar hisobni tenglashtirisha olmadi.

"Neftchi" - "Navbahor" 4:3
"Markaziy stadion" (Farg'ona)
Gollar: Mansur Saidov (10), Alisher Xoliqov (45), Anvar Berdiev (54, pen), Sherzod Hakimov (83) - Elyor Jahonov (39), Evgeniy Sayko (48), G'ayrat Jo'raev (67)
"Neftchi": Yuriy Coy, Vladimir Radkevich (Dilyorbek Ermatov, 57), Iqbol Boboxonov, Mansur Saidov, Iqbol Akramov, Sardor Mirzaev (Islom To'xtaxo'jaev, 58), Sanjar Asqaraliev, Baxtiyor Yoqubov, Anvar Birdiev, Alisher Xoliqov, Oybek Nurboev (Sherzod Hakimov, 79)
"Navbahor": Oleg Gorvic, Rahmatullo Berdimurodov, Doniyor Usmonov, Evgeniy Sayko, Sunnatilla Mamadaliev, Elyor Jahonov (Abdumalik Abdullaev, 86), Timur Ayzatulov (Ilhom Boydadaev, 78), Maksim Krivoy (Ivan Nagaev, 67), Otabek Valijonov, G'ayrat Jo'raev
Ogohlantirishlar: Evgeniy Sayko (6), Otabek Valijonov (29), Oybek Nurboev (43), Iqbol Akramov (49), Doniyor Usmonov (53), Ilhom Boydadaev (78), Sanjar Asqaraliev (90), Sunnatilla Mamadaliev (90)

Shu tariqa, "Neftchi" muhim g'alabaga erishib, turnir jadvalida 10-o'ringa yuqoriladi. "Navbahor" esa bir pog'ona pastlab, 9-o'ringa joylashdi.

Bir o'yin tarixi. 7 ta gol urilgan "Neftchi" - "Navbahor" derbisini yodga olamiz