Ўтган мавсумда Про лигада дебют қилган Тошкентнинг "Дўстлик" жамоаси жорий мавсумда Биринчи лигада иштирок этмоқда. Айтишимиз мумкинки, Про лига клуб учун яхши тажриба мактаби вазифасини бажариб берди. Бу келгусида албатта асқотиши шубҳасиз.

Самуг Дадаев бошчилигидаги жамоа ўз тарбияланувчиларига таянган ҳолда яна катта савияга кўтарилишни мақсад қилган. Бу йўлда жамоа ёшларни тарбиялаш, уларни катта футболга қадам қўйишида ўзининг стратегиясини ривожлантиришда давом этяпти. Хусусан, бу йил "Дўстлик" сафида 2009, 2010 йилда туғилган футболчилар Дурбек Хусанов (2010), Миродил Мираҳматов (2009), Исмоил Абдураҳимов (2010), Камолиддин Турсунов (2009) дебютини ўтказишга муваффақ бўлди.

Жамоа Биринчи лиганинг Шарқ минтақасида 4-турдан сўнг 4 ғалаба, 12 очко билан яққол пешқадам бўлиб турибди. 4-турда меҳмонда "Фарғона ФА" таслим қилинди (4:1). Голларга Жавоҳир Алижонов, Сардор Асатиллаев, Адҳамжон Баҳодиров, Саидмурод Каримов муаллифлик қилди. "Дўстлик" навбатдаги учрашувини 17 май куни "Локомотив-БФК"га қарши ўтказади.

Биринчи лига. "Дўстлик" ёшлар билан дадил одимламоқда