"2017 yil Mirabror aka O'zbekiston Futbol Federaciyasidan ketishi aniq bo'lgach, chaqirib mendan keyin farzandlarim, nabiralarim ko'rishi uchun qisqa bir videofilm qilib berishni so'radi. Filmki, Mirabror Usmonovning futbolda amalga oshirgan ishlari haqida.

Avvaliga oilaviy davra uchun qisqa metrajli film uchun harakat boshlandi. Lekin, scenariy rivojlanishi natijasida bu loyiha kichik bir xujjatli filmga aylana boshladi. Mohir rejissyor Farrux Rasulov ham filmning tobora kengayib borayotganini ko'rib, xujjatli film qilish taklifini berdi

Shu tariqa 5-10 daqiqalik fotosuratlarning ketma-ketligidan iborat juda bir oddiy filmdan salkam 50 daqiqali xujjatli film dunyoga keldi. Uning ustida Farrux Rasulov boshchiligidagi texnik guruh ish olib bordi. 2017 yil avgust oyida suratga olish ishlari tugab, film tayyor bo'ldi.

Orada O'zbekiston Futbol Federaciyasining saylov konferenciyasi tugab, Mirabror aka prezidentlikni Umid Ahmadjonovga topshirdilar. U kishining o'zi hayotining oxirgi kunlarigacha o'z ishlari bilan mashg'ul bo'lsalarda, futbolni unuta olmadi; bir armon bilan yashadi: jahon chempionati armoni…

Film sifatli kameralarda suratga olingan, yaxshi montaj qilingan edi. Har qanday telekanalning arxivini, efirini bezab bera olardi, chamamda. Bir kuni Mirabror akaga balki, filmni teleekranlarda namoyish qilarmiz deganimda, rozi bo'lmadilar. Vaqti keladi, o'zim aytaman, dedilar.

… va aytmay ketdilar. Keyin malum bo'lishicha, biz Farrux bilan birga ishlagan ushbu film aynan bugungi namoyish uchun qilingan ekan. Film shu kunlarda namoyish etilmasa, o'zining ahamiyatini yo'qotgan, o'z maqsadiga erishmagan bo'ladi. Chunki, bugun Mirabror Usmonov oramizda yo'q", - deb yozadi Sanjar Rizaev tvitterdagi o'z sahifasida.

Quyida ushbu filmni tomosha qiling.

"Birinchilik davri" yoxud Mirabror Usmonov haqidagi hujjatli film