Jamoani yangi mavsumga Rauf Inileev va Sergey Tokov juftligi tayyorlamoqda. Tarkib yoshartirilgani bilan bir qatorda tajribali futbolchilar va legionerlar ham jalb etilayotganini takidlash joiz. Jamoa yaqinda Artyom Filiposyanning o'tganini elon qildi. Bu hammasimi? Yana o'zgarishlar bo'ladimi? Shu va boshqa savollar bilan "Surxon" murabbiyi Sergey Tokovga yuzlandik. Mutaxassis savollarimizga quyidagicha javob berib o'tdi.

- Antaliyadagi yig'indan ko'nglingiz to'lyaptimi? Tarkibdanchi?

- Ahil jamoa tuzishga harakat qilyapmiz. Albatta vaqtimiz kam. Chunki jamoani kecha qabul qilib oldik. Oldimizda vaqt bor ekan undan unumli foydalanishga harakat qilamiz. Mashg'ulotlar reja asosida davom etyapti. O'rtoqlik uchrashuvlarida o'yinimizni yanada shakllantiyapmiz, deya olaman.

- Rauf Inileev bosh murabbiy sifatida ishlayapti. Bu borada fikringiz qanday? Nega aynan Inileev variantida to'xtalindi?

- Rauf Talgatovich tajribali murabbiy. O'z vaqtida terma jamoa va klublarimizda faoliyat yuritgan. Uning tajribasi bizga zarur. Yakunda Inileev variantida qoldik. Chunki hali etalicha tajribaga ega emasmiz. Bu borada murabbiyning maslahatlari asqotadi. Natijaga kim javob beradi? Barchamiz birgalikda. Masajistdan tortib murabbiylar shtabigacha birlashishimiz kerak.

- Jamoa tarkibida yana o'zgarish bo'ladimi? Transfer oynasi yopilishiga oz qoldi?

- Rasman 5 nafar legioner. Yana bir xorijlik futbolchi shu kunlarda kelishi kerak. Bu haqida malum qilamiz.

- Ularda jamoani kuchaytirishga qodir sifat ko'rdingizmi?

- Umid qilamizki, legionerlar o'z sifatlari bilan natijalarga hissa qo'sha olishadi. O'yinlarini ko'rdik, kuzatdik. Chempionatimiz oddiy emas. Legioner o'z chempionatida yaxshi o'ynagani hech narsani anglatmaydi. U kuchli ekanligini isbotlashi kerak. Sifatli legionerlar Superligada ham muammo. Kelayotgan xorijlik futbolchi ligani kuchsiz, deb o'ylashi mumkin. O'zbek futbolchilari ham yaxshi darajada. Legionerlar bilan bemalol raqobatlasha olishadi.

- "Surxon"ni ikkinchi "Olimpik", deya tariflashmoqda...

- Biz ikkinchi "Olimpik" emas, "Surxon"miz. O'z uslubimiz, futbolga qarashlarimiz bor. Jamoani yoshartirishga harakat qilamiz. Mening fikrim yoshlarga o'ynash imkoniyatini berish lozim. Ular o'sishi zarur. Asosiy maqsadimiz ham shunday. Ammo bu tarkib yuz foiz yosharib ketadi, degani emas. Salohiyatini, potencialini ko'ramiz. O'zini ko'rsatishiga imkon beramiz. Oldimizda 1-2 o'rinni olish vazifasi qo'yilmagan. Maqsadimiz sifatli va muxlislarga yoqadigan o'yin ko'rsatish.

- Artyom Filiposyanning transferi kutilmaganda bo'ldimi?

- Yoshlarga o'rnak sifatida ko'rsata olish mumkin bo'lgan futbolchi. Artyom o'tgan mavsumni Olmaliqda o'tkazdi, yaxshi formada. Yoshlar va tajribaning uyg'unlashishi darkor. Shu bois ayrim tajribali futbolchilar xizmatidan foydalanamiz.

"Biz ikkinchi "Olimpik" emas, "Surxon"miz" - Sergey Tokov