Ҳа, мундиал биз учун кетма-кет олти бор армонга айланди. Аммо бу Жаҳон Чемпионатига бўлган қизиқишларимизни камайтириб қўймайди. Ўша 32 бахтли терма жамоа мухлислари бор эътиборларини Россия яшил майдонларига қаратганлари каби, мухлис сифатида биз ҳам 4 йилда ақалли бир ой ҳақиқий футбол ҳавоси билан яшашга ҳақлимиз. Суперлигадаги танаффус шунинг учун ҳам юзага келди.

Жаҳон Чемпионатидаги савияни ҳамма яхши билади. У орзу, у талаблари юқори бўлган мусобақа, у ҳаммамиз учун катта мактаб. Мухлислар футболдан завқ олиши, шарҳловчилар, журналистлар ўзи учун нимадир ўрганиши, мутахассисларимиз кўриши, изланиши, футболчилар эса ҳавас қилиши учун ҳам Жаҳон Чемпионати керак. Мана шундай дақиқалар бор пайтда, биз ички чемпионатимизни давом эттиришимиз тўғри эмасди.

Ўзбекистонлик футболчилар иссиқ ҳавода биринчи бор ўйнаётгани йўқ. Июлдаги ўйинларни бироз кечроқ бошлаб, бемалол августга етиб олса бўлади. Мен ҳар нарсадан кир қидирмасдан, бугун старт олаётган мундиални мириқиб кўришни истардим. У нафақат мухлислар учун, балки биз кўп нарса умид қилаётган ёш футболчиларимиз учун ҳам жуда ас қотади. Ахир улар ҳам нимагадир интилишлари керак. Шундай экан, бизда катта танаффус. Навбат эса футбол гултожисига.

Бизда танаффус. Ҳақиқий футбол бугун бошланади