Қаршиликлар кетма-кет учта турда юз фоизлик натижа қайд этган ҳолда биринчи ўринни банд этиб турибди. “Аждарлар” “Қизилқум”, “Андижон”, “Сурхон” жамоалари устидан ишончли тарзда ғалаба қозонди. Мана шу беллашувларда жамоа ҳужумчиси Бобир Абдихолиқов 3та гол урди. Тезкор дриблинг соҳиби миллий терма жамоамизнинг февраль ойидаги йиғинига ҳам жалб қилинди. Яқинда иқтидорли футболчини суҳбатга чорлаб ўзимизни қизиқтирган саволлар жавоб олдик.

- Суперлига баҳслари коронавирус сабаб маълум муддатга тўхтатилди. Демак, ортда қолган учта тур ҳақида фикрлашсак, қисман хулосалар чиқарсак бўлади. “Насаф” ўз фалсафасига содиқ қолган ҳолда ҳаракат қилмоқда. Жамоага келган янги футболчилар, легионерлар ҳам ўзларини кўрсатишмоқда. Бу ҳолат алдамчими? Ёки жамоанинг мақсадлари ростдан ҳам жиддийми?
- Албатта. Ҳар бир ўйинда ғалаба иштиёқида майдонга тушамиз. Мухлисларимизни хурсанд қилишни, ғалаба тортиқ қилишни ўйлаймиз. Осиё Чемпионлар Лигаси йўлланмасини қўлга киритиш учун ҳаракат қиламиз. Бунга салоҳиятимиз етади деб ўйлайман. Аввало биринчи ўринда соғлиқ туради. Бошқа касб эгалари ҳам ўзларини асрашлари керак. Ҳаммаси тез орада ўтиб кетишига ишонаман.

- Ўтган давр мобайнида жамоа авлодлар алмашинуви жараёнини бошидан ўтказди. Жамоадошларингиз Шароф Муҳитдинов, Ислом Кенжабоев тажриба тўплаб, етакчиликни ўз қўлига олмоқда...
- Авлодлар алмашинуви ҳамма жамоада бўлади. Қолган футболчилар ҳам махоратини ва тажрибасини ошириб бормоқда. Бу билан тўхтаб қолмоқчи эмасмиз. Янада олдинга интилишимиз лозим.

- Ўтган мавсумда Ҳумоюн Муртазоев марказий ҳужумда ўйнагани боис сиз кўпроқ қанотда ўйнадингиз. Бу йил эса вазият бошқача. Тўпурар бўлишни мақсад қилганмисиз?
- Қандай мусобақа бўлишидан қатъий назар, кўпроқ гол уриб тўпурарлар пойгасида етакчилирдан бўлишга ҳаракат қиламан. Жамоамга фойда тегса бўлгани. Суперлига, Ўзбекистон кубоги, Лига кубоги фарқи йўқ.

- Миллий терма жамоа билан Беларусга қарши кечган учрашувда иштирок этдингиз. Таассуротлар қандай? Барибир, олимпия терма жамоаси билан ўртадаги фарқ катта...
- Европа вакили билан тенгма, тенг ўйнадик. Натижа муҳим эмас. Расмий баҳслар олдинда ҳали. Ўртоқлик ўйинлари орқали тажриба ва малака тўплаймиз.

- Вадим Абрамовда бошқа мураббийларда кўрмаган қайси жиҳатларни сездингиз?
- Кўпроқ ўйинни ўз қўлимизга олишимизни айтди. Назарий машғулотларда “Манчестер Сити”нинг ўйинларини ўргандик. Майдонга чиқишдан олдин ҳар томонлама кўрсатма берди.

- Икки нафар легионе Марко Станоевич, Дилавер Харисдан нима кутса бўлади?
- Иккиси ҳам яхши савиядаги футболчилар. Станоевич “Сурхон”га гол уриб ғалабага ҳисса қўшди. Харис ҳам чакки эмас. Фақат янада юқори спорт формасига кириб олиши учун вақт керак.

Абдулазиз Искандаров суҳбатлашди.

Бобир Абдихолиқов: “Бу мавсум тўпурар бўлишни мақсад қилганман”