Maksim Shackix, Vitaliy Denisov va Sanjar Tursunovdan keyin endilikda Bobir Abdixoliqov Ukraina premer ligasida faoliyat yuritadigan bo'ldi.

Shahboz Beg'amovning tvitterda malum qilishicha, Bobir Abdixoliqov Lvovning "Rux" jamoasi bilan 3 yillik bitimga imzo chekkan. Kecha klubda tibbiy ko'rikdan o'tgan va "Rux" futbolchini kechaning o'zidayoq premer liga qaydnomasidan ro'yxatdan o'tkazgan.

Bobir Abdixoliqov "Rux" jamoasidagi ilk mashg'ulotni ham o'tkazishga ulgurgani haqida ham Shahboz Beg'amov o'z sahifasida malum qildi.

"Rux" klubi bugun Bobir Abdixoliqov transferini rasman elon qilishi kutilmoqda.

Etiborli tarafi, Bobir Abdixoliqov "Rux" jamoasida Ukrainada mashhur futbolchi bo'lgan Maksim Shackix singari 16-raqamni tanladi. Malumki, Shackix 2015-2016 yilgi mavsumlarda aynan "Rux" jamoasi sharafini himoya qilgan hamda futbolchilik faoliyatini aynan shu jamoada tugatgan.

Bobir futbolni puldan ustun qo'ydi

Bobir Abdixoliqov transferi malumotlari bilan batafsil bo'lishib turgan Shahboz Beg'amov kuni-kecha shunday post qoldirdi:

"Bobirga Osiyodan manfaatli takliflar bo'ldi, lekin Abdixoliqov futbolchi sifatida o'sishni tanladi. Evropada esa juda ko'p muzokaralar olib borildi va nihoyat bir qarorga kelindi. Ukrainada oson bo'lmasligi aniq. Qiyin yo'l orqali bo'lsa ham Bobir yanada shakllanishni istadi.
Masalan, o'zimizdan ham Navbahor va Turon Bobirga hozirgi bo'lajak shartnomasidan ikki karra ko'proq maosh taklif qildi. Nasaf esa kelishuvni uzaytirish uchun kvartira, mashina va nihoyat yaxshi sharoitga ega shartnoma berdi. Lekin Bobir Evropada o'ynash, kuchliroq ligalarga yo'l ochishni puldan ustun qo'ydi. Omad, Bobir", - deya yozadi Shahboz Beg'amov.

Bobir Abdixoliqov "Rux" bilan 3 yillik shartnoma imzoladi va Shackix raqamini tanladi