- Чемпионатдан қандай таассуротлар қолди?
- Буни ёшликдан орзу қилиб келамиз. Буни тасаввур қилиш қийин. Ҳиссиётларимиз чексиз. Очиғи халқимиз бизни бундай кутиб олишини кутмаганди. Барчамиз бундан жуда хурсанд бўлдик.

- Нима деб ўйлайсиз, бу охирги чемпионлик бўлмайдими?
- Бу кейинги ғалабалар учун пойдевор бўлади. Янада кучлироқ футболчи бўлишга уринамиз.

- Сизни футболдагилар "Пеле" деб чақиришади...
- Биринчи мураббийим "Пеле" деб атарди. Шу-шу ҳамма шундай чақиради. Футбол қироли номи билан мени чақиришлари ёқимли.

- Бу йилдан Сиз 10-рақамни танладингиз...
- Уйдагиларим афсонавий футболчилар ўйнашларини айтишди, шу боис 2018 йилги мавсумдан 10-рақамни танладим. Рақамнинг юки оғирлик қилмайди.

- "Пахтакор" сизга қизиққани ва тасдиқланмаган маълумотларга кўра "Насаф" Сиз учун 3 миллиард сўм сўрагани ҳақида хабарлар чиқди. Агар клублар барчаси футболчининг ўзига боғлиқ дейишса Бобур Абдухолиқов қайси клубни танлаган бўларди?
- "Насаф" барибир иккинчи уйим. Ҳар қандай футболчи ўз уйидан кетишни истамайди. Бир клубда 6-7 йил ўйнаса ўша клубга қаттиқ боғланиб қолади.

- Янги мавсумга тайёргарликни "Насаф" сафида ўтказмадингиз. "Ал Файсали" билан ўйинга тайёрмисиз?
- "Ал Файсали" билан ўйинга тайёрман деб ўйлайман. Сабаби ОЧЛ баҳсини орзиқиб кутаётгандим. Стадионимиз тўлиб тошади, трибуналар тўла стадионда ўйнаш ажойиб ҳиссиётлар беради.

- Чемпионларга Malibu автомашинаси совға қилинди...
- Президентимизга шунчалик эътибор қилиб, бизга мана шундай мукофот берганлари учун барча жамоадошларим номидан миннатдорчилик билдириб қоламан. Худо хоҳласа уларнинг ишончларини оқлашда давом этамиз.

- Машинани ўзингиз ҳайдайсизми?
- Ҳайдовчилик гувохномам бор, лекин ёшликдан меҳнат қилиб, пул топиб ота-онамга машина совға қиламан деб ният қилганман. Шундай экан Malibu'ни оиламга тақдим этаман.

- Сиз баъзида марказда, баъзида қанотда ўйнайсиз. Қайси жойда ўзингизни яхши ҳис қиласиз?
- Ёшликдан ёқтирган позициям марказий ҳужумчи. Лекин мураббийлар мени қанотга қўйишса ҳам у ерда ўйнашга тайёрман. Қайси жойда ўйнасам ҳам жамоа учун боримни бераман. Шунчаки қанотдаги Абдухолиқовдан, марказий ҳужумдаги Абдухолиқов кучлироқ.

Толибжон Қосимов ва Шаҳбоз Беғамов суҳбатлашди

Бобур Абдухолиқов: "Халқимиз бизни ажойиб тарзда кутиб олди"