Jamoa kelasi yilda Superligada ishtirok etishi inobatga olingan holda endilikda tashkiliy masalalar bo'yicha jiddiy ishlar boshlab yuborilgan.

Ayniqsa, "Bobur Arena" stadioni chimini yangilash zaruriyati tug'ilgani sababli bu masalada ham oldingi siljish borasida amaliy chora-tadbirlar boshlandi.

Maydon sifatini talab darajasiga keltirish hamda chimni almashtirish yuzasidan o'z ishining ustasi bo'lgan va Respublikamizning qator stadionlaridagi maydonlarni parvarishlagan Uchqun Quvonov boshchiligidagi ishchi guruh endi "Bobur Arena" stadionida qizg'in ishga kirishishgan. Shu bilan birga, stadion direktori Omonillo Mirzaev rahbarligi ostidagi xodimlar ham ishga jiddiy bel bog'lagan.

Ayni paytda maydon chimini ko'chirish ishlari boshlangan. Ushbu chimdan yana foydalanish maqsadida endilikda "Andijon" futbol klubi qoshidagi bolalar va o'smirlar futbol maktabida joylashgan jamoa qarorgohiga olib boriladi. U erda uchta tabiiy maydon bo'lib, ikkitasi standartlar asosida barpo etilgan. Aynan ulardan birida tabiiy chim yo'qligidan kelib chiqib, endilikda "Bobur Arena" maydonining chimi bilan to'ldiriladi.

Hozirda katta ishchi guruh "Bobur Arena"da o'ziga yuklatilgan vazifani bajaryapti. Dastlabki bosqichda yuqorida takidlaganimizdek, maydon chimini ko'chirish ishlari olib borilmoqda.

"Bobur Arena"da maydon chimi yangilanmoqda