Mazkur epizod "Kichik qala" ko'chasida tasvirga olingan. Boku shahri, Kaspiy dengizi bo'yida joylashgan bo'lib, sayyohlarni o'ziga jalb etishi ko'pchilikka malum.

O'zbekiston Milliy olimpiya qo'mitasining taklifiga ko'ra, faoliyatimdagi sakkizinchi katta musobaqada ishtirok etadigan bo'ldim. "Sokker Klub" ko'rsatuvini yodga olsangiz, xalqaro musobaqalarda qatnashib, oliy ligaga qaytganimda, huddi u er birinchi liga bo'lib ko'zimga ko'rinishini takidlagandim. Xalqaro musobaqalarda qatnashib yurgan OAV vakili hech ham bizning futbolga ko'nika olmaydi, "servis" yo'q.

Shu kunga qadar quyidagi musobaqalarda ishtirok etdim.

1. Qatar. Doxa. 2011. Osiyo Kubogi.

2. BAA. Ras Al Hayma va Fujeyra. 2012. U19 Osiyo chempionati.

3. Turkiya. Antaliya, Bursa. 2013. JCH. U-20.

4. BAA. Dubay, Sharja. 2013. JCH. U-16.

5. Janubiy Koreya. Incheon. 2014. Osiyo o'yinlari.

6. Avstraliya. Sidney, Melburn, Brisben. 2015 yil. Osiyo Kubogi.

7. Qatar. Doxa. 2016 yil. Rio Olimpiada o'yinlarining saralash uchrashuvlari, U-23.

Sportchilar shaharchasi

Doxada bo'lib o'tgan 2011 yilgi Osiyo Kubogi va Incheondagi Osiyo o'yinlari men uchun juda katta maktab vazifasini bajarib bergan. Ayniqsa, Incheondagi musobaqada sportchilar shaharchasida istiqomat qilganim. Bokuda ham shunday sharoitda, sportchilar shaharchasida faoliyat olib boradigan bo'ldim. Bu esa ishning sifatini oshirish bilan birga, sportchilar bilan bir oila bo'lish imkoniyatini beradi. Qo'shnilarim ham anoyilardan emas, Taekvandochilar. Faqat ular 15 may kuni uchib kelishadi. Yon qo'shni, jon qo'shnilarim qatorida Zafar aka Imomxo'jaev, MOQ marketing bo'limi rahbari Kamoliddin Ergashev, MOQ xalqaro bo'limi boshlig'i, Humoyun Ibragimov.

Bugunga qadar gandbol, badiiy va sport gimnastikasi, boks, karate, tennis, engil atletika, og'ir atletika va o'q otish sport turlarida qatnashadigan vakillarimiz Bokuga etib keldilar. Musobaqaga jiddiy etibor qaratilgan. Shuning uchun ham MOQ bosh kotibi Oybek Kasimov ham ayni paytda Bokuda. Mazkur musobaqa 2018 yil Indoneziyada bo'lib o'tadigan Osiyo o'yinlari uchun tayyorgarlik vazifasini o'taydi. O'z navbatida Osiyo o'yinlari orqali olimpiadaga hozirlik ko'ramiz. Bokudagi musobaqada asosan ikkinchi va uchinchi tarkib azolari qatnashayaptilar. Bu ular uchun asosiy tarkibga kirish uchun katta imkoniyat.

Sportchilar shaharchasiga Ozarbayjonning sobiq Prezidenti Xaydar Aliev nomi berilgan.

Medallar uchun kurashda O'zbekiston qatorida, mezbon Ozarbayjon, Turkiya va Qozog'iston delegaciyalari asosiy favoritlardan biri hisoblanadilar.

Avlodlar almashuvi paytiga to'g'ri kelib qolgan gandbolchilarimizning musobaqadagi ishlari yurishmayapti. Ertaga badiiy gimnastika, tennis va boks turlari bo'yicha musobaqalar start oladi. Ochilish marosimi Toshkent vaqti bilan soat 22:00da boshlanishi rejalashtirilgan. Katta ehtimol musobaqaning barcha o'yinlari "Sport TV" orqali namoyish etiladi. Turnir tashkilotchilarining bizga malum qilishlaricha, barcha hamkor davlatlarga translyaciya huquqi bepul taqdim etilgan.

Nodirxo'ja Yuldashev.

Ozarbayjon, Boku.

Boku kundaligi, 1-kun. "Brilliant qo'l" filmi yodingizdami?