"Borussiya" Myonxengladbax "Bavariya"ni mag'lub etgach ketma-ket uch o'yindirki g'alaba nimaligini bilmay kelmoqda. "Borussiya" mehmoni bo'ladigan "Gamburg" ham so'nggi uchta uchrashuvdan buyon g'alaba qozona olgani yo'q.

"Borussiya-Park"da bugun to'qnash keladigan har ikkala jamoa g'alaba tamini sog'inib qolgani aniq.

Diter Xekking jamoasi uchun bugungi g'alaba turnir jadvali nuqtai nazaridan ham ancha ahamiyatli. Jamoa so'nggi uchta turdagi muvaffaqiyatsizlik tufayli "kuchli-uchtalik"ni tark etib, 8-pog'onaga tushib ketdi. "Gamburg"da ham shu holat. Ularni sharoitlari yanada og'irroq. Muvaffaqiyatsiz seriya tufayli "Gamburg" xavfli hududga tushib ketdi. Bugungi g'alaba esa ularni ushbu "hudud"ni tark etishlari yordam berishi mumkin.

Aynan shu jihatlarni hisobga oladigan bo'lsak, tarixan ancha katta qarama-qarshilik keskin kurashlarga boy kechadi.

Ertaga esa Bundesliganing 17-turidan o'rin olgan qolgan bellashuvlar bo'lib o'tadi.

Unda peshqadam "Bavariya" "Shtutgart"da mehmon bo'ladi. Yupp Xaynkess qo'l ostida "Bavariya" allaqachon qishki chempionlikni hal qilib bo'lgan. "Shtutgart" esa o'z uyida joriy mavsumda faqatgina bir marotaba mag'lubiyaga uchragan. Ushbu mag'lubiyatni jamoa yaqindagina "Bayer"ga qarshi bahsda qabul qilib olgandi.

Italiyalik yosh mutaxassis Domeniko Tedesko boshqaruvida o'z mavqeini ancha tiklab olgan, ayni paytda sovrinli o'rinlar uchun kurashayotgan "Shalke" Frankfurtga safar qiladi. "Ayntraxt" uy jamoasi ekanligini hisobga oladigan bo'lsak, bu turda "Shalke"ga oson bo'lmaydi.

Peter Boshshni istefoga chiqargan va uning o'rniga boshqa Peterni olib kelgan "Borussiya" esa nihoyat o'tgan turda uzoq davom etgan noxush seriyaga barham bergandi. "Kyoln"dan quvg'in qilingan Peter Shtoger qo'l ostida g'alabani nishonlagan "Borussiya" Dortmund bu gal "Xoffenxaym"ni qabul qiladi. Bu to'qnashuvda yaxshi kayfiyat dortmundliklarga qo'l kelishi mumkin. "Xoffenxaym" esa Dortmundda 4 yildan buyon g'alaba qozona olmayapti.

Birinchi davraning oxirgi o'yini esa yakshanba kuni "Leypcig" hamda "Gerta" o'rtasida bo'lib o'tadi.

Bundesliga, 17-tur.
15 dekabr, juma
"Borussiya" Myonxengladbax - "Gamburg" (00:30)

16 dekabr, shanba
"Shtutgart" - "Bavariya" (19:30)
"Augsburg" - "Frayburg" (19:30)
"Ayntraxt" - "Shalke" (19:30)
"Verder" - "Maync" (19:30)
"Kyoln" - "Volfsburg" (19:30)
"Borussiya" Dortmund - "Xoffenxaym" (22:30)

17 dekabr, yakshanba
"Gannover" - "Bayer" (19:30)
"Leypcig" - "Gerta" (22:00)

"Borussiya" Myonxengladbax yoqimsiz seriyaga chek qo'yadimi?