26 январь 2019 йил. 00:55. Лондон. "Эмирейтс"
Англия Кубоги. 1/16 финал
"Арсенал" – "Манчестер Юнайтед"
Дисквалифициядагилар: -
Жароҳатланганлар: Роб Холдинг, Дэнни Уэлбек, Эктор Бельерин, Генрих Мхитарян - Маркос Рохо, Крис Смоллинг, Маруан Феллаини

Англия лига кубогидаги эстафетани клублар ўртасидаги "отахон" турнир қабул қилиб олади. Тўртинчи раунднинг илк ўйинидаёқ қизиқарли ва ашаддик рақиблар тўқнаш келади.

Сўнгги йилларда "Арсенал" ва "Манчестер Юнайтед" Англия футболида иккинчи планга тушиб қолди. Улар эндиликда ЕЧЛ йўлланмаси учун кураш олиб боришмоқда. Бироқ бундан бир неча йиллар олдин улар АПЛ чемпионлиги учун асосий даъвогар саналишарди.

"Туманли альбион"даги мана шундай жангнинг олдидан "Манчестер Юнайтед" учун ёддан чиқмайдиган 1998/99 йилги мавсум Англия Кубоги ярим финалини эсга оламиз. Ўшанда жамоалар Бекхэм ва Бергкампнинг ажойиб ҳаракатлари билан голлар алмашишганди. 74-дақиқада Рой Кин четлатилганидан кейин "қизил иблислар" бир киши кам бўлиб қолишди. Финал ҳуштаги чалинишидан олдин "канонирлар" Рей Парлор билан ўйинни кучайтиришди ва пенальти ишлашди. Аммо Петр Шмейхель рақиби Деннис Бергкампнинг зарбасини қайтариб қаҳрамон бўлганди. Қўшимча бўлимларда Райан Гиггз ўз голи билан жамоага ғалаба келтирганди.

Ўша учрашув қатнашчиларидан бири Оле-Гуннар Сульшер бўлганди. Норвегиялик мутахассис МЮда бош мураббий сифатида дастлабки 7 ўйиннинг барчасида ғалабага эришган илк мураббий бўлиб турибди.

"Арсенал" ҳали ҳам барқарор жамоага айлана олмаяпти. Айниқса, мавсумнинг ушбу қисмида жамоа ўз кучини тежашни билмаётгани учун жуда ёмон ўйинлар кўпайиб кетмоқда. Бироқ лондонликлар бугунги ўйинга ажойиб кайфиятда ташриф буюришади. Улар бундан олдин "Челси" устидан ғалабага эришишди, 2:0.

ТАХМИНИЙ ТАРКИБЛАР

"Челси"га қарши ўйинда Эктор Бельерин жароҳат олди. Бу жиддий бўлиб чиқди ва у учун мавсум якунланди. Шифокорларнинг айтишига кўра, футболчи камида 9 ойни майдондан ташқарида ўтказиб юборади.

Демак, Унаи Эмери ўнг қанот ҳимояси учун Штефан Лихтштайнер ёки ёш Эйнсли Мейтленд-Найлсдан фойдаланади. Балки у бугун тажрибага ишониши ҳам мумкин.

Дарвозаларда эса катта эҳтимол билан Чех ва Ромерони кўрамиз. Чунки улар мавсум давомида кўп ҳам ўйин амалиётига эга бўлмаяпти.

ЎЗАРО ЎЙИНЛАР

Ўзаро ўйинларда устунлик "қизил иблислар" томонида. Рақиблар шу кунга қадар барча турнирларда 228 марта ўзаро куч синашишган. Шуларнинг 81тасида "Арсенал", 96тасида "Манчестер Юнайтед" устун келган. 51 ўйинда дуранг қайд этилган. Голлар уриш борасида устунлик манкунианликлар томонида - 322 - 349.

Англия Кубогида эса жамоалар 15 марта ўзаро куч синашишган. 6 марта "канонирлар", 7 бора "қизил иблислар" бунда зафар қучишган. 2 ўйинда ғолиб аниқланмаган. Голлар уриш борасида ҳам тенглик: 19 - 19.

"Арсенал" 13, "Манчестер Юнайтед" 12 марта ушбу кубокни қўлга киритган.

Жамоаларнинг сўнгги ўзаро 10 ўйини:

05.12.2018	Манчестер Юнайтед - Арсенал	2:2 (1:1)
29.04.2018	Манчестер Юнайтед - Арсенал	2:1 (1:0)
02.12.2017	Арсенал - Манчестер Юнайтед	1:3 (0:2)
07.05.2017	Арсенал - Манчестер Юнайтед	2:0 (0:0)
19.11.2016	Манчестер Юнайтед - Арсенал	1:1 (0:0)
28.02.2016	Манчестер Юнайтед - Арсенал	3:2 (2:1)
04.10.2015	Арсенал - Манчестер Юнайтед	3:0 (3:0)
17.05.2015	Манчестер Юнайтед - Арсенал	1:1 (1:0)
09.03.2015	Манчестер Юнайтед - Арсенал	1:2 (1:1)
22.11.2014	Арсенал - Манчестер Юнайтед	1:2 (0:0)

Бугун Англия Кубогида даҳшатли баҳс. "Арсенал" - "Манчестер Юнайтед" учрашуви превьюси