Superliga turnir jadvalida 3-o'rinni egallab turgan "Bunyodkor" o'z maydonida 13-pog'onada borayotgan "Buxoro"ni qabul qiladi. Uchrashuv 18:15da start oladi.

"Bunyodkor"ning bu yilgi maqsadi sovrinli o'rinlardan birini egallash, yani 3-o'rindan pastga tushmaslik. Buning uchun imkon qadar ochko yo'qomaslik zarur bo'ladi. "Buxoro"ning maqsadi ham malum, xavfli zonani tark etib mavsumni yuqori o'rinlarda yakunlab qo'yish.

Ikkinchi davra boshlanganidan beri "Bunyodkor" to'rtta bellashuvda zafar quchdi va barcha g'alabalar uydagi o'yinlarda qo'lga kiritildi. "Bunyodkor" o'z maydonida "Dinamo", "Surxon", "Metallurg" va "Qizilqum" jamoalaridan ustun keldi.

Lekin "Bunyodkor" oxirgi uch o'yinda faqat bir marta zafar quchdi. "Qizilqum" Toshkentda 2:1 hisobida mag'lub etilganini aytmasak, "qaldirg'ochlar" "Loko" bilan durang o'ynab, safarda "Qo'qon-1912"ga 0:3 hisobida mag'lub bo'lishdi.

"Bunyodkor" bosh murabbiyi Vadim Abramov bir paytning o'zida O'zbekiston milliy terma jamoasi bosh murabbiyi ham hisoblanadi. Bir vaqtning o'zida ham terma jamoa, ham klubni boshqarish qanchalik tasir ko'rsatishini vaqt o'tib bilib olamiz.

"Buxoro" ikkinchi davra start olgach safarda to'rtta o'yinda maydonga tushib, shundan ikkitasida g'alaba qozondi. Oxirgi ikkita g'alaba safarda qo'lga kiritilganini hisobga olsak, buxoroliklarning kayfiyati ancha yaxshi.

"Buxoro" navbati bilan Samarqandda "Dinamo"ni, undan keyin Qarshida "Nasaf"ni mag'lub etib qaytdi. Agar bugun "Bunyodkor" ham mag'lub etilgudek bo'lsa bu chinakam sensaciya bo'ladi. Lekin "Bunyodkor"dan uydagi bahsda ochko yo'qotishni kutish qiyin.

Toshkentda o'tgan oxirgi 5 o'yin

2018. Ikkinchi bosqich. "Bunyodkor" - "Buxoro" 3:0

2018. Birinchi bosqich. "Bunyodkor" - "Buxoro" 3:1

2017. "Bunyodkor" - "Buxoro" 3:0

2016. "Bunyodkor" - "Buxoro" 3:0

2015. "Bunyodkor" - "Buxoro" 2:0

Oxirgi besh o'yinda faqat "Bunyodkor" zafar quchgan. To'plar nisbati 14-1. Shuningdek, uch marta 3:0 hisobi qayd etilgan. Buxoroda kechgan birinchi davra uchrashuvi 2:2 hisobida yakun topgandi.

Bugun futbol. "Bunyodkor" - "Buxoro"