Soat 14:00da start oladigan bahs bir qarashda katta ahamiyatga ega bo'lmasligi mumkin, chunki ikkala jamoa ham o'z maqsadiga erishdi. Lokomotiv chempion bo'ldi, Bunyodkor esa ikkinchi o'rinni egalladi. Lekin shunga qaramay, bugungi bellashuv bir qator savollarga javob berishi kutilmoqda.

Birinchidan, ikkala jamoa ham o'z uyidagi o'yinlarda shu paytgacha mag'lub bo'lmadi. Agar Lokomotiv bugun g'alaba qozonsa, bu yil oliy ligada o'z maydonida umuman yutqazmagan yagona jamoa bo'lib qoladi.

Lokomotiv uydagi uchrashuvlarni yakunladi va hozircha shunday maqomga ega bo'lib turibdi. O'z navbatida Bunyodkor ham uy bellashuvlarida hali mag'lub bo'lmagan. Bugun esa nimadir ro'y berishi mumkin.

Ikkinchidan, Lokomotiv ketma-ket beshta o'yindan beri Bunyodkordan gol o'tkazmayapti. Temiryo'lchilar o'tgan yil oliy ligada bu raqibni ikkala o'yinda ham mag'lub etishgandi: uyda 3:0 va safarda 1:0. Shuningdek, bu mavsum birinchi davrada 0:0 hisobi qayd etildi.

2014 yil o'tkazilgan O'zbekiston Kubogi finalida esa Lokomotiv 1:0 hisobida zafar quchgan. Shu yilning 25 oktyabr sanasida o'tkazilgan O'zbekiston Kubogi 1/2 final dastlabki bahsida ham Loko 1:0 hisobida g'alabaga erishdi. Shundan beri temiryo'lchilar xoh oliy liga, xoh Kubok bahslari bo'lsin Bunyodkordan gol o'tkazishmayapti. Ushbu anana bugun ham davom etadimi? Demak, bu ham o'yinga bo'lgan qiziqishni oshiradi.

Uchinchidan, mavsum to'purari bo'lgan Temurxo'ja Abduxoliqov chempionatni nechta gol bilan yakunlaydi? Uning hisobida hozircha 21ta gol bor. Temurxo'ja bugun ham to'p kiritib, o'z gollari sonini oshira oladimi? Buni ham o'yin davomida bilib olamiz.

To'rtinchidan esa bugun Loko zafar quchgudek bo'lsa, safardagi g'alabalari soni 10ta bo'ladi. Hozircha temiryo'lchilar hisobida safar o'yinlarida 9ta g'alaba bor. To'plar nisbati 32-16. Shunday ekan, Bunyodkor stadionida bo'lib o'tadigan bahsni diqqat bilan kuzatamiz.

Bugun futbol. Bunyodkor - Lokomotiv