TTZdagi "Lokomotiv" stadionida "Lokomotiv" Navoiyning "Qizilqum" klubini qabul qiladi. Turnir jadvalida "Lokomotiv" 4-o'rinni egallab turibdi va jamoa 18 ochko jamg'argan. "Qizilqum" esa 9 ochko bilan 10-o'rinda bormoqda.

Bugun "Lokomotiv" o'z maydonida joriy mavsum hisobidan Superligadagi 6-uchrashuvini o'tkazadi. Bo'lib o'tgan beshta o'yindan ikkitasini "temiryo'lchilar" g'alaba bilan yakunlashgan ("So'g'diyona" 2:0, "Buxoro" 3:1), shuningdek uch marta durang o'ynashgan ("Metallurg" 1:1, "Qo'qon-1912" 1:1, "Paxtakor" 0:0). Qayd etish lozim, "Lokomotiv" "Paxtakor"ga qarshi bahsni "Bunyodkor" stadionida o'tkazgan.

Bilasizmi? "Lokomotiv" o'z maydonida hali mag'lub bo'lmagan. O'z uyida yutqazmagan jamoalar Superligada to'rttani tashkil etyapti: "Paxtakor", "Lokomotiv", "Navbahor" va "Qo'qon-1912".

Fakt: "Lokomotiv" oxirgi beshta o'yinning to'rttasini g'alaba bilan yakunladi va o'z holatini ancha yaxshilab oldi. "Lokomotiv"ning oxirgi beshta o'yindagi to'plar nisbati 11-3. "Loko" oxirgi ikkita bahsda ettita gol urdi.

"Qizilqum" haqida gapiradigan bo'lsak, bu jamoa mavsumni aynan bugungi raqibiga qarshi boshlab, o'z maydonida 0:3 hisobida mag'lub bo'lgandi. Bugun "oltin izlovchilar" o'sha mag'lubiyat alamini olishga harakat qilishadi. Albatta, imkoniyatlar borasida "Qizilqum" maqtana olmaydi, shunga qaramay ochko olishga urinib ko'rishi turgan gap.

"Qizilqum" shu paytgacha o'tkazilgan bahslarning faqat uchtasida g'alaba qozondi ("So'g'diyona" 3:1, "Neftchi" 1:0, AGMK 3:0). Sakkizta bellashuvda esa imkoniyatni boy berdi. Bu jamoa hozircha durang o'ynamagan. Shuningdek, "Buxoro" ham Superligada durang qayd etgani yo'q.

Bilasizmi? "Qizilqum" hozircha safarda to'rtta o'yin o'tkazib, shundan faqat bittasida g'alaba qozongan. Jamoa 4-turda "So'g'diyona"ni mag'lub etib qaytgan. "Qizilqum"ning safardagi to'plar nisbati 4-7.

Fakt: "Qizilqum" oxirgi ikkita bahsda mag'lub bo'ldi. Jamoa o'z maydonida "Metallurg"ga 1:2 va safarda "Navbahor" 0:3 hisobida yutqazib qo'ydi.

Bugun futbol. "Lokomotiv" - "Qizilqum"