"Metallurg" o'z maydonida "Qo'qon-1912" bilan bahs olib boradi. Uchrashuv 18:30da start oladi. Musobaqa jadvalida "Metallurg" 7 ochko jamg'argan va 7-o'rinni egallab turibdi. "Qo'qon-1912" hisobida esa 5 ochko ochko mavjud bo'lib, bu jamoa 13-o'rinda boryapti.

"Metallurg" shu paytgacha ikki bor g'alaba qozondi va ikkalasi ham uydagi o'yinlarda qo'lga kiritildi. Bekobodliklar dastlab "Buxoro"ni 2:0, undan keyin "Qizilqum"ni 4:1 hisobida mag'lubiyatga uchratishdi. Bugun "Metallurg" o'z uyida uchinchi o'yinini o'tkazadi.

Bungacha safarda uch bor maydonga tushgan "Qo'qon-1912" uch xil natija qayd etdi. No'mon Hasanov shogirdlari dastlab "Navbahor" bilan 1:1 hisobida durang o'ynashdi. Keyin Olmaliqda 1:7 hisobida mag'lubiyatga uchrashdi hamda o'tgan tur Navoiyda 1:0 hisobida zafar quchishdi. Bu "Qo'qon-1912"ning yangi mavsumdagi ilk g'alabasi bo'ldi.

Jamoalarning o'zaro oxirgi beshta o'yini:

2018 yil. "Metallurg" - "Qo'qon-1912" 1:0

2017 yil. "Metallurg" - "Qo'qon-1912" 3:0

2016 yil. "Metallurg" - "Qo'qon-1912" 3:1

2015 yil. "Metallurg" - "Qo'qon-1912" 2:1

2003 yil. "Metallurg" - "Qo'qon-1912" 3:1

Bekobod shahrida kechgan oxirgi beshta uchrashuvning hammasida maydon egalari zafar quchishgan. To'plar nisbati 12-3. Yana shuni aytish lozim, "Qo'qon-1912" oxirgi ikki o'yindan beri safarda "Metallurg" darvozasiga to'p kirita olmayapti. Bugungi bellashuvda ham mezbonlarning imkoniyati yuqori baholanmoqda.

Bugun futbol. "Metallurg" - "Qo'qon-1912"