Bugun Qarshida futbol ishqibozlari "Nasaf" - "Qizilqum" qarama-qarshiligi guvohi bo'lishadi. O'z tarkibini sezilarli darajada kuchaytirib olgan "Qizilqum" kamida kuchli uchlikdan joy olishni maqsad qilgan. O'z navbatida "Nasaf" ham doim medallar uchun kurashishini yaxshi bilasiz.

"Nasaf" boshqalarga nisbatan kam o'yin o'tkazgan, shu bois 12 ochko bilan 6-pog'onada turibdi. Jamoa hisobida 3 g'alaba va uch durang bor. To'plar nisbati 5-2. 8ta uchrashuvda maydonga tushgan "Qizilqum" esa 14 ochko to'plagan holda 3-o'rinni band etib turibdi. To'plar nisbati 12-8.

"Nasaf" Superligada mag'lubiyatga uchramagan ikki jamoadan biri. Yana biri - "Paxtakor". Ro'ziqul Berdiev shogirdlari Superligada oxirgi uchta bahsdan ikkitasida g'alaba qozonib, bir bor durang o'ynashdi. "Nasaf" safarda "Qo'qon-1912" va "So'g'diyona"dan ustun kelib, o'z uyida "Paxtakor" bilan durang o'ynadi.

Qizig'i shundaki, hozircha Qarshida ikkita uchrashuv o'tkazgan "Nasaf" hali g'alaba qozonmagan.

Mavsumni ikkita g'alaba bilan boshlagan "Qizilqum" 3-turda "Dinamo" bilan durang o'ynab, so'ngra yana ikki bellashuvda zafar quchdi. Navoiyliklar shundan so'ng qatorasiga uch o'yinda g'alaba qozona olishmadi. Xususan jamoa "Navbahor" va AGMKga imkoniyatni boy berib, Bekobodda "Metallurg" bilan 1:1 o'ynadi.

Bugun Qarshida har ikki jamoaning chiroyli o'yin ko'rsatishi kutilmoqda. Imkoniyatlar borasida 50/50 deya olamiz.

17 may, seshanba. 19:00

NASAF – QIZILQUM

Hakamlar: Rahimbek Karimov, Bektursin Kannazarov, Shohnur Yuldashev, Jahongir Noraliev

Nazoratchi: Rashid Aytekov

VAR hakami: Asker Najafaliev

VAR assistenti: Alisher Usmonov

Komissar: Vladimir Nazarov

Bugun futbol. "Nasaf" - "Qizilqum"