Медаллар учун ҳаракат қилаётган "Навбаҳор" ўз майдонида "Қизилқум"ни қабул қилади. Турнир жадвалида "Навбаҳор" 14 очко билан 7-ўринни эгаллаб турибди. Тўплар нисбати 13-8. "Қизилқум" ҳисобида ҳозирча 2 очко мавжуд ва бу жамоа 13-поғонада келяпти. Тўплар нисбати 4-17.

Кетма-кет учта ғалабага эришган "Навбаҳор" ўтган тур "Бунёдкор"га 1:3 ҳисобида ютқазиб қўйди. Айтиш мумкинки, бу баҳсда "лочинлар" жуда бўш ҳаракат қилишди. Мана энди "Навбаҳор" мағлубият аламини бугун "Қизилқум"дан олишга уриниб кўради.

Очко эса ўз навбатида навоийликларга ҳам сув ва ҳаводек зарур. Негаки бу жамоа мавсум бошидан бери ҳали ғалаба қозонгани йўқ: 2та дуранг ва 6 мағлубият. Бундан эса Тачмурод Агамурадов хафа бўлаётгани бор гап. Шамакович янги жамоасида илк ғалабасини қачон қўлга киритади, буниси энди қоронғу.

"Навбаҳор" бугун ўз майдонида тўртинчи учрашувни ўтказади. Аввалги 3та баҳснинг ҳаммасида майдон эгалари ғалаба қозонишган: "Локомотив" 2:0, "Бухоро" 2:0 ва "Сўғдиёна" ҳам 2:0. Кўриб турганингиздек, "Навбаҳор" ўз майдонидаги ўйинларда ҳали гол ўтказмаган ва учала баҳсни 2:0 ҳисобида ўз фойдасига ҳал этган.

"Қизилқум"га келсак, бу жамоа бугун тўртинчи бор сафарда тўп тепади. Навоийликлар сафарда фақат "Машъал"дан очко ола билишган, "Қўқон-1912" ва "Локомотив" билан кечган ўйинларда эса йирик мағлубиятга учраган. Ва охирги иккита сафар беллашувида "Қизилқум" ўз дарвозасидан 7та гол ўтказиб юборди.

P.S. Бугун соат 20:00да бошланадиган учрашувни "Маҳалла" ТВда тўғридан тўғри кузатиб боринг.

Бугун футбол. "Навбаҳор" - "Қизилқум"