Бугун турни якунлаб берувчи ўйинда "Манчестер Юнайтед" жамоаси "Эвертон"ни қабул қилади.

АПЛ, 5-тур
"Манчестер Юнайтед" – "Эвертон"
17.09.2017, 20:00
"Олд Траффорд"
Бош ҳакам: Андре Марринер (Бирмингем).

Кеча Манчестер шаҳрининг бошқа бир жамоаси "Сити" 6:0 ҳисобида ғалаба қозонди ва турнир жадвалида МЮни қувиб ўтди. Энди Моуриньо шогирдлари пешқадамликни қайтариб олишлари учун "Эвертон"ни камида 5 тўп фарқи билан мағлуб этишлари керак. Лекин, Жозе учун бу энг асосий мезон бўлмаслиги аниқ. Бунақанги ўйинларда уни ҳар қандай ҳисобдаги ғалаба қаноатлантиради.

МЮ учун жуда катта йўқотиш бу жамоа етакчиларидан бири Поль Погбанинг жароҳат олиши бўлди. ЕЧЛ 1-тури доирасида "Базель"га қарши ўйиннинг 19 дақиқасида тиззаси ости мушакларини шикастлаб олган Погба ўз ўрнини Феллайнига бўшатиб берган эди. Погба камида бир, бир ярим ой ўйнамаслиги маълум қилинди. Клуб шифокорларининг сўзларига кўра, Поль ҳатто бу йил умуман майдонга туша олмаслиги ҳам мумкин экан. Нима бўлганда ҳам Погбага соғлиқ тилаб тезроқ сафга қайтишини кутиб қоламиз.

"Эвертон" эса пайшанба куни Европа лигасида "Аталанта"дан йирик мағлубиятни қабул қилиб олган эди (0:3). Чемпионатда ҳам жамоа ишлари орқага кета бошлаган. Бу ҳолатдан чиқиб кетиш учун Куман ниманидир ўзгартириши керак. "Аталанта" билан ўйнамаган Пикфорд, Гуйе, Эшли Уильямс ва Сандро Рамиреслар кучга тўлган ҳолда МЮга қарши саф тортишади.

"Олд Траффорд"да ўтадиган бугунги учрашувда кўпчилик кутаётган жиҳат эса умуман бошқа. Ишонинг, бугунги беллашувнинг кулминацияси голлар ёки ҳисоб бўлмайди. Энг асосий эътибор Уэйн Рунига қаратилади. Бугун "Орзулар театри" ўз афсонасини олқишлайди. "Манчестер Юнайтед" тарихидаги энг яхши тўпурарни бутун стадион бирдек олқишлар билан қарши олади. Ҳаттоки, МЮ йирик ҳисобда олдинда бораётган бўлса ва Руни ҳисобни қисқартирса, "қизил иблислар" мухлислари унга қарсак чалишса ҳам ҳайрон қолмайман. Бу шундай ўзгача стадион, у ҳеч қачон собиқ ўйинчиларга хуштак чалмаган. Бу стадионда ўйнаб кетганлар яна шу ерга қайтишганда албатта олқишлар билан қарши олинишган. Демак, барча футбол ишқмбозларини бу ўйинни ўтказиб юбормасликка чақираман. "Олд Траффорд" ўзининг том маънодаги афсонасини қандай қарши олишини жонли эфирда кўриш бошқача бўлади.

Қизиқ:

- "Манчестер Юнайтед" АПЛда "Эвертон"ни 33 бор мағлуб этган. Бундан кўп фақат "Астон Вилла" таслим этилган (34 маротаба);
- Рональд Куман АПЛда Жозе Моуриньога қарши 5 маротаба ўйнаган ва умуман ютқазмаган. Бу чемпионат рекорди;
- Уэйн Руни ва Морган Шнайдерлин МЮга клубдан кетганидан сўнг гол урган саккизинчи ва тўққизинчи футболчи бўлишлари мумкин. Олдинроқ бу ишни Хьюз, Даблин, Инс, Гиллеспи, Берг, Кэмпбелл ва Уэлбек уддалаган.

Тахминий таркиблар:

"Манчестер Юнайтед": Де Хеа – Валенсия, Байи, Жонс, Блинд –Матич, Эррера – Мата, Мхитарян, Рэшфорд – Лукаку.

"Эвертон": Пикфорд – Кин, Уильямс, Жагиелка – Мартина, Гуйе, Дэвис, Бейнс – Руни, Сигурдссон – Сандро.

Ўйнамайди: Ибрагимович, Погба, Рохо – Фунес Мори, Баркли, Коулман, Боласи.
Сўроқ остида: Шоу – Маккарти.

Мураббийлар фикрлари:

Жозе Моуриньо ("Манчестер Юнайтед"): "Эвертон"да кўплаб ажойиб футболчилар ва зўр жамоа бор. Ўйин биз учун жуда қийин бўлади. Руни? Ўйлашимча, уни муносиб қарши олиш кутмоқда. Мен бу мамлакатда "афсона" деган сўзни кўп ишлатишади деб ҳисоблайман. Лекин, бу бошқача ҳолат. Уэйн клубнинг ҳақиқий афсонаси - ўйинлар сони, голлар сони ва совринлар сони".

Рональд Куман ("Эвертон"): "Тажрибали ўйинчилар ўзларини кўрсатадиган вақт келди. Биз ушбу баҳсда муносиб иштирок этишимизга аминман. Мавсум боши қийин ўтишини билардик, лекин тез орада "Эвертон" тўғри йўлга қайта олади".

Англия Премьер-лигаси турнир жадвали >>> АПЛ

Бугун Лондон кўк рангга бурканадими ёки қизил? Превью

Толибжон Қосимов

Бугун "Орзулар театри" ўз афсонасини олқишлайди. Превью