Murod Aliev klub Bosh direktori lavozimida ish boshlagach, birinchi navbatda Akademiya faoliyati isloh qilinishiga jiddiy etibor qaratdi. Murabbiylar malakasini oshirish, yosh iqtidorli o'yinchilarga alohida urg'u berib, ularni bosh jamoa mashg'ulotlarida ishtirok etishini tizimli ravishda taminlash yo'lga qo'yildi.

Kuni kecha “Bunyodkor” futbol klubi Bosh direktor o'rinbosari Zokirjon Xoliqov BAA davlatiga safar uyushtirib, “Emireyts” futbol klubi va Akademiyasining faoliyati bilan yaqindan tanishdi va rasmiylar bilan uchrashdi. Aytish kerakki, “Emireyts” BAA Pro ligasi ishtirokchisi hisoblanadi. Jamoa yozgi transfer oynasi vaqtida tarkibini jahon futbol yulduzi Andreas Inesta bilan kuchaytirdi. Hali ham maydonda javlon urayotgan ispaniyalik yulduz dunyoning bir qator mamlakatlarida o'z futbol Akademiyasiga asos solgan.

Zokirjon Xoliqov “Emireyts” futbol klubi direktorlar kengashi raisi Yusuf Abdulloh Al Batran va Andreas Inesta bilan samimiy ruhda o'tgan uchrashuvda Akademiyalar faoliyati, ish tizimi haqida suhbatlashdi. Shuningdek, “Bunyodkor” Akademiyasi jamoalarini BAAda tashkil etiladigan musobaqalarda qatnashishi to'g'risida so'z bordi. Jumladan, BAA davlatida o'tkaziladigan bolalar turnirlarida ishtirok etadigan “Bunyodkor” Akademiyasi jamoalari uchun “Emireyts” futbol klubi tomonidan barcha sharoitlar yaratib beriladi. Yusuf Abdulloh Al Batran “Bunyodkor” haqida etarlicha malumotga ega ekanligini takidlab, o'zbekistonlik futbolchilarga hurmati baland ekanligini malum qildi. Xususan, o'z vaqtida “Bunyodkor” va “Emireyts” futbol klubida to'p surgan Jasur Hasanovni “bizniki” der ekan, nafaqat Akademiya jamoalariga, balki bosh jamoamiz BAAda o'quv-yig'in mashg'ulotlari o'tkazsa, moddiy manfaatlarsiz klubga tegishli maydonlardan foydalanishiga ruxsat berilishini bildirdi.

Suhbat davomida janob Yusuf Abdulloh Al Batran, albatta tez orada O'zbekistonga tashrif buyurishini hamda “Bunyodkor” futbol klubi bilan yaqindan tanishishini takidladi.

“Bunyodkor” “Emireyts” klubi bilan hamkorlikni yo'lga qo'ymoqda