Tadbirdan murod bayram munosabati bilan ko'ngli yarim bolalarning kayfiyatini ko'tarish va ularning orasidan iqtidorlarni tanlab olib katta hayotga Bunyodkor orqali qadam qo'yishini taminlash edi. Tadbirda mehmonlarimiz uchun bir qator sport o'yinlari tashkil qilindi. Xususan, bolalar shahmat, shashka, stol tennisi, engil atletika, futbol, quvnoq estafeta bahslarida bellashishdi. Albatta bu sport bahslari turlari aynan kimnidir g'alaba qozonishi uchun emas, balki festival ko'rinishida o'tkazildi. Bemalol takidlash mumkinki, mehmonimiz bo'lgan mehribonchilik uyi tarbiyalanuvchilari uchun kun ajoyib ruh va kayfiyatda o'tdi.

Sport tadbirlari yakuniga etgach, bolalarga Bunyodkor futbol klubi tasischisi, O'zbekneftgaz akciyadorlik jamiyati tomonidan ajratilgan esdalik sovg'alari topshirildi. Sovg'alarni O'zbekneftgaz akciyadorlik jamiyati Boshqaruv raisi o'rinbosari Usmonov Behzod Boburovich va Bunyodkor futbol klubi direktori Sherzod Haqberdiev topshirdi.

Sport tadbirlari yakuniga etganidan keyin ham bayram davom etdi. O'zbekona urf-odatlarga ko'ra mehmonlarimiz bir piyola choyga taklif qilindi va albatta milliy taom palov tarqatildi. Tushlikdan so'ng mehmonlarimiz uchun Bunyodkor akademiyasi va stadioni bo'ylab sayohat uyushtirildi. Bolalar akademiyamizda tengqurlariga yaratilgan sharoitlar bilan tanishdi. So'ng mehmonlarimiz Bunyodkor stadioniga tashrif buyurib, poytaxtimiz ko'rki bo'lgan o'yingohni yaqindan tomosha qilishdi. Esdalik uchun suratlarga tushishdi va shu tariqa bayram haqiqiy bayramona kayfiyatda yakunlandi. Zero, mazkur tashabbus va taklifning asosiy maqsadi ham shu edi.

“Bunyodkor” futbol akademiyasida “1 iyun - Xalqaro bolalarni himoya qilish kuni” munosabati bilan yana bir xayrli tadbir o'tkazildi