Ushbu uchrashuvlar “Bunyodkor”, “Jar” “Paxtakor” stadionlarida o'tkaziladi. Superliga taqvimiga ko'ra “Bunyodkor” 21 sentyabr kuni o'z maydonida “Lokomotiv”ni qabul qilishi kerak. Saralashning “E” guruhi bahslari “Paxtakor” stadionida o'tadi. Ushbu guruhdan Janubiy Koreya, O'zbekiston, Mo'g'uliston o'rin olgan. “F” guruhidagi uchlikda Filippin, Gongkong, Nepal ayollar terma jamoalari joylashgan. Ular “Jar” stadionida to'p tepishadi. “G” guruhi o'yinlari “Bunyodkor” stadionida o'tishi rejalashtirilgan. O'ylantirayotgan jihati “qaldirg'ochlar”ning “Lokomotiv”ga qarshi o'yini ko'chiriladimi? Biz bu masala yuzasidan klub bosh direktori Ulug'bek Mirzaevga murojaat qildik.

“To'g'ri aytdingiz Iordaniya, Eron, Bangladesh bu guruhdan joy oldi. Barcha ayollar milliy terma jamoalarining mashg'ulotlari “Bunyodkor” akademiyasi maydonlarida bo'lib o'tadi. OCHL bahslari vaqtida bosh jamoamiz asosiy maydondan foydalana olmadi. Lekin “Bunyodkor” – “Lokomotiv” o'yini baribir “Bunyodkor” stadionida o'tkaziladi. “G” guruhidan o'rin olgan Iordaniya – Bangladesh o'yini 19 sentyabr kuni mazkur stadionda tashkillashtiriladi. Taqvimga ko'ra, 22 sentyabr kuni Eron va Bangladesh o'zaro to'qnashadi. Biz mazkur masalada OFKga chiqdik. O'zbekiston futbol associaciyasidan ham iltimos qildik. Tashkilotlar iltimosimizga rozilik bildirishdi. “Lokomotiv”ga qarshi o'yin 21 sentyabr kuni “Bunyodkor” stadionida bo'ladi”,- deydi Ulug'bek Mirzaev.

Bunday pallada maydon maysasiga ortiqcha og'irlik tushmaydimi? Ulug'bek Mirzaev bu savolga quyidagicha javob berdi.

“Maydon juda yaxshi holatda. Ayollar o'rtasidagi Osiyo chempionati saralashida 3ta uchrashuvga mezbonlik qilamiz. Bilsangiz OCHLda stadonimiz 12ta o'yinni o'zida qabul qilgandi. Hech qanday muammosi yo'q. Lekin mashg'ulot maydonlarimizga katta yuklama tushishi mumkin”,- deydi Ulug'bek Mirzaev.

“Bunyodkor” – “Lokomotiv” uchrashuvi hech qaerga ko'chirilmaydi