Moziyning ajoyib futbolchisi va murabbiyi bo'lmish Konstantin Ivanovich Beskov xotirasiga bag'ishlab o'tkazilgan musobaqada 2004 yilda tavallud topgan futbolchilardan iborat sakkizta jamoa ishtirok etdi. Unda “Spartak”, “Dinamo”, “Lokomotiv” va CSKA (barchasi – Moskva), “Anji” (Mahachqalal), “Kuban” (Krasnodar), “Bunyodkor” (Toshkent) hamda Egorevsk viloyati futbol maktabi tarbiyalanuvchilari ishtirok etishdi.

Otabek G'ulomxo'jaev va Mirkamol Qosimov boshchiligidagi “Bunyodkor” tarbiyalanuvchilari birinchi turda “Lokomotiv” futbolchilariga 1:2 hisobida imkoniyatni boy berib qo'yishdi. Ikkinchi bahsda o'smirlarimiz CSKA futbol maktabidagi tengqurlari bilan jangavor durang qayd etishdi – 2:2. Vakillarimiz guruhning so'nggi o'yinida Egorevsk viloyati futbol maktabi tarbiyalanuvchilaridan 2:1 hisobida ustun kelishdi va ikkinchi o'rin bilan yarim finalga yo'llanma olishdi.

Final yo'llanmasi uchun “Bunyodkor-2004” vakillari Moskva spartakchilari bilan kuch sinashishdi. Qiziqarli kechgan bahsning asosiy vaqtida hisob ochilmadi. Penaltilar seriyasida esa omad mezbonlarga kulib boqdi – 5:6.

Uchinchi o'rin uchun kechgan o'yinda “Bunyodkor” guruh bosqichidagi raqibi “Lokomotiv” bilan bellashdi. Bu safar Otabek G'ulomxo'jaev va Mirkamol Qosimov shogirdlari raqiblaridan revansh olishni uddasidan chiqishdi – 4:3.

Shu tariqa, “Bunyodkor” futbol maktabining 2004 yilda tavallud topgan tarbiyalanuvchilari K.I.Beskov xotirasiga bag'ishlab Moskvada o'tkazilgan XIII xalqaro musobaqaning bronza medallarini qo'lga kiritdi.

“Bunyodkor” tarbiyalanuvchilari Rossiyadagi xalqaro turnir sovrindori