Kecha Toshkent shahridagi Singapur menejmentni rivojlantirish institutiga tashrif buyurib, talabalar bilan uchrashuv o'tkazgan jamoamizning navbatdagi manzili O'zbekiston Davlat jahon tillari universiteti bo'ldi. Xuddi Singapur menejmentni rivojlantirish instituti singari bu dargoh ham "Bunyodkor"ga juda yaqin, deyarli qo'shni oliygohlardan biri desak mubolag'a bo'lmaydi.

Avvalgisidan farqli ravishda universitetga tashrifimiz talabalar bilan uchrashuv, o'zaro suhbat va savol-javoblar bilan yakuniga etdi. Ammo talabalarning millionlar o'yiniga qiziqishi, o'zbek futboliga bo'lgan etibori, jonkuyarligi tadbirning chiroyli o'tishini taminladi.

Talabalar nafaqat "Bunyodkor", balki o'zbek futbolining og'riqli nuqtalariga oid savollar bilan murojaat qilishdi. Tabiiyki, barcha savollarga batafsil va qoniqarli javob qaytarildi. Tadbir yakunida universitet rahbariyatiga estalik sovg'alari taqdim qilindi. Talabalarga esa, 31 mart kuni bo'lib o'tadigan Superliga doirasidan o'rin olgan "Bunyodkor" - "Paxtakor" o'yiniga chiptalar berildi. Qolaversa, universitet futbol jamoasi bilan o'rtoqlik o'yini o'tkazish borasida ham kelishuvga erishildi.

"Bunyodkor" vakillari Vadim Abramov boshchiligida O'zbekiston Davlat jahon tillari universitetiga tashrif buyurishdi