Mavsum yakunlanib borayotgan ayni paytda “Andijon” jamoasi mazmunli o'yinlari bilan o'z ishqibozlarini mamnun etib kelmoqda. 27-turda “Andijon” jamoamiz o'z maydonida “So'g'diyona”ni qabul qilib 3:2 hisobida mag'lubiyatga uchratdi. Natijada “burgutlar” chempionatda qatorasiga uchinchi g'alabaga erishdilar. Undan avval Farg'onadagi uchrashuvdayoq jamoamiz ikkita noxush ananaga barham berdi. Birinchidan, andijonliklar o'z tarixida ilk bor Farg'onada “Neftchi”ni dog'da qoldirib sensaciya qayd etishdi. 1992 yildan buyon milliy chempionatimiz o'tkazilib kelinayotgan bo'lsa, shu paytgacha jamoamiz safarda “Neftchi”ni yuta olmagandi. Anvar Berdievning yagona goli bilan jamoamiz ushbu noxush ananaga chek qo'ydi. Farg'onadagi yutuqdan so'ng andijonliklar chempionatda birinchi marta ketma-ket ikkinchi g'alabasini qo'lga kiritdi. Bu natijani jamoamiz “So'g'diyona” bilan o'yinda ham takrorlab, g'alabalar seriyasini uchtaga etkazdi. Nafaqat bu yil, balki o'tgan yildan beri “Andijon” klubi chempionatda ketma-ket g'alabalarga erisha olmayotgandi. Ushbu yoqimsiz ananaga ham barham berildi.

Bundan uchta tur avval 15-pog'onadan joy olib, oliy ligadan tushib ketish arafasida turgan andijonliklar o'z imkoniyatlarini ancha yaxshilab olishdi. Jamoa uchta uchrashuvda 9 ochko jamg'arib, ochkolari sonini 27 taga etakazib oldi. Bu bilan “Andijon”ni elitada qolishi ham deyarli hal bo'ldi. Tan olish kerak, Edgar Gess ketganidan so'ng jamoa o'yinida o'zgarish yuz berdi. Boshqaruvni o'z zimmasiga olgan Sergey Kovshov omadli murabbiy ekanligini namoyish etdi. Gess bosh murabbiyligida andijnoliklar 20 ta o'yin o'tkazib 14 ochko to'plashgandi. Kovshovning qo'li ostida esa jamoamiz shu kungacha 7 ta uchrashuvda maydonga tushib, 13 ochko jamg'ardi. Albatta, Predrag Vuyovich va Temur Vasilevni ketishi jamoa uchun sezilarli yo'qotish bo'ldi. Shunga qaramay, ikkinchi davrada tarkibga qo'shilgan Anvar Berdiev, Iqbol Boboxonov va Abdulloh Olimov o'zlariga bildirilgan ishonchni oqlashmoqda. Ayniqsa, Berdievning tajribasi jamoaga katta yordam bermoqda. Mahoratli hujumchi andijonliklar safida shu kungacha 8 ta uchrashuvda maydonga tushib raqiblar darvozasini 7 bor ishg'ol etdi. Bu gollarning orasida Berdiev sobiq klubi “Neftchi” darvozasini ham ishg'ol etdi. Birinchi davrada “Mashal” va “Neftchi”da zaxirada o'tirgan Boboxonov bilan Olimov mavsumning ikkinchi qismida “Andijon” safiga qo'shilib o'yin amaliyotiga ega bo'lishmoqda. Farg'onada “Neftchi”ga qarshi kechgan bahsda Olimov o'zining eng yaxshi o'yinini ko'rsatganini ham aytib o'tish kerak.

Birinchi navbatda jamoada moliyaviy yoki boshqa muammolar bo'lmasa natija yaxshi bo'lishi aniq. Andijon viloyati hokimi hamda klubimiz homiysi “GM-Uzbekistan” qo'shma korxonasi ham imkon qadar etibor qaratib, yordam berishga harakat qilmoqda. “So'g'diyona” bilan bo'lgan o'yindan keyin Andijon viloyati hokimi, Andijon Futbol Federaciyasi prezidenti SH.Q.Abdurahmonov kiyinish xonasiga kirib, futbolchilarni g'alaba bilan qutladi. Ketma-ket g'alabalar uchun SH.Q.Abdurahmonov futbolchilarga alohida minnatdorchilik bildirdi.

Xullas, ayni paytda “burgutlar” parvozda va jamoa qolgan uchrashuvlarni ham mana shunday ruhda o'tkazishni maqsad qilgan. Keyingi turni jamoamiz Toshkentda “Bunyodkor”ga qarshi o'tkazadi. Bu o'yinda ham futbolchilar g'alabani o'ylashmoqda. Undan keyin andijonliklar o'z maydonida “Dinamo” klubini qabul qilishadi. Mavsumning so'nggi turini esa “Andijon” poytaxtda “Paxtakor”ga qarshi o'tkazadi. Ushbu uchrashuvlarda ham jamoamiz muxlislarini xursand etishini kutib qolamiz.

"Burgutlar" parvozda