Kecha “Milliy” stadionda o'tkazilgan final o'yinida Toshkent shahrining “Iqbol” hamda Navoiy viloyatining “Kelachi” jamoalari g'oliblik uchun bahs olib borishdi. Ilk bora tashkil etilgan “Charm to'p-2019” ananaviy futbol musobaqasida dastlab 3-o'rin egasi aniqlandi. Qashqadaryo viloyatining “Oqqamish” hamda Namangan viloyatining “Navkent” jamoalari o'rtasidagi bahsda avvaliga vohalik yoshlar 2-0 hisobida oldinga chiqib olishgan edi. Ammo, “Navkent” jamoasi g'alabaga bo'lgan irodasini namoyon etdi va yakunda 3-2 hisobi bilan g'alaba qozongan holda musobaqaning bronza medaliga sazovor bo'ldi.

Final o'yini oldidan kichik sahnalashtirilgan ko'rinish namoyish etildi. Maydonga karnay-surnay sadolari ostida doirachilar, ularning ortidan raqqosalar kirib kelishdi. So'ngra maydonga “Charm to'p-2019” ananaviy futbol musobaqasining Respublika bosqichiga etib kelgan barcha ishtirokchi jamoalar taklif etildi. Tadbirda so'zga chiqqan O'zbekiston Respublikasi Bosh vazirining o'rinbosari Aziz Abduhakimov musobaqa ishtirokchilarini ajoyib sport bayrami bilan qutlar ekan, chempionlik uchun kurashadigan jamoalarga omad tiladi.

Ilk bora tashkil etilgan musobaqa g'olibiga atalgan ko'chma kubokni esa maydonga o'zbek futbolining tirik afsonalari Birodar Abduraimov hamda To'lagan Isoqovlar olib chiqishdi va aynan ular final uchrashuvining ramziy to'pini ham tepib berdi.

Mamlakatimiz iftixori, dunyoning eng yaxshi hakamlaridan biri, FIFA referisi Ravshan Ermatov boshqargan o'yinning asosiy vaqtida hisob ochilmagach, g'olibni aniqlash uchun penaltilar seriyasiga murojaat qilindi. O'ziga xos “omad lotoreyasi”da poytaxtlik yoshlarga omad kulib boqdi – 4:2. Shu tariqa, “Charm to'p-2019” ananaviy futbol musobaqasining ilk g'olibi Toshkent shahri Bektemir tumanining “Iqbol” jamoasi bo'ldi.

Musobaqa g'oliblari va ishtirokchi jamoalarni taqdirlash marosimida O'zbekiston Respublikasi Jismoniy tarbiya va sport vaziri Dilmurod Nabiev, O'zbekiston Milliy olimpiya qo'mitasi prezidenti Rustam Shoabdurahmonov va boshqalar ishtirok etdi. G'olib va sovrindorlarga oltin, kumush va bronza medallari, shuningdek diplomlar topshirildi. “Iqbol” jamoasi esa ko'chma kubok bilan taqdirlandi.Shuningdek, turli nominaciyalar bo'yicha ham eng yaxshilar aniqlanib, qimmatbaho sovg'alar bilan mukofotlandi.

“Eng yaxshi darvozabon” – Bekzod Amanullaev (“Iqbol”, Toshkent sh.)

“Eng yaxshi himoyachi” – Zuhriddin Murodillaev (“Kelachi”, Navoiy)

“Eng yaxshi yarim himoyachi” – Shuhrat Isganov (“Navkent”, Namangan)

“Eng yaxshi hujumchi” – Sanjar Aliqulov (“Ettiguzar”, Sirdaryo)

“Eng yaxshi futbolchi” – Sunnatilla Toshpo'latov (“Kelachi”, Navoiy)

“Eng yaxshi murabbiy” – Ahmadjon Xolmirzaev (“Navkent”, Namangan)

"Charm to'p-2019" musobaqasining bosh sovrini Toshkentda qoldi (FOTOGALEREYA)