Bundan tashqari 2016 yilda klublarimiz qayd etgan etiborli natijalar haqida to'xtalamiz.

25 yillik jadvalni 11 karra chempion “Paxtakor” boshqarib bormoqda. 740ta o'yinda 1630 ochko jamg'argan “sherlar” eng ko'p g'alabaga erishgan (504ta) va eng ko'p gol urgan jamoa (1678ta) bo'lib turishibdi. Klub 23-turda “Navbahor”ga qarshi bahsda 500-g'alabasini qo'lga kiritdi. O'zbekiston tarixida qolgan hech bir jamoa 500ta g'alabaga erishmagan. Keyingi yil jamoa 800-o'yinni o'tkazadi, bundan tashqari 1700-golni urishi va 650-golni o'tkazishi mumkin.

Ro'yxatda ikkinchi pog'onada borayotgan Farg'onaning “Neftchi” klubi “Paxtakor”dan 138 ochkoga ortda qolmoqda. Jamoa 7-turda “Sho'rtan” bilan 2:2 hisobida durang o'ynagandi. O'sha o'yinda Abbos Maxstaliev tomonidan urilgan gol klub uchun 1500-gol bo'lib tarixda qoldi. Farg'onaliklar 2017 yil 8 ochko olishsa o'z ochkolarini 1500taga etkazib olishadi.

Oliy ligadan tushib ketishiga oz qolgan “Navbahor” klubi umumiy ro'yxatda 3-o'rinda. 9-turda “Qo'qon-1912”ga qarshi o'yindagi g'alaba “lochinlar”ning 350-g'alabasi bo'ldi. “Lochinlar” bu mavsumda 900-golni o'tkazib yuborishdi. Jamoa 2017 yilda ochkolarini 1200taga etkazib olishi deyarli aniq.

10 karra bronza medal sohibi Qarshining “Nasaf” klubi umumiy jadvalda 4-o'rinda bormoqda. Qarshi klubi bu mavsum so'nggi turda "Mashal"ni mag'lub etib o'z ochkolarini 1100tadan oshirib oldi. Qarshi klubi agar 2017 yilda 31ta gol ursa umumiy gollari sonini 1100taga etkazib olishi mumkin. "Ajdarlar" keyingi mavsum 600-o'yinni o'tkazishadi.

Bu yilgi mavsumda “Buxoro” klubining 1000-goli urildi. 30-turda “Sho'rtan” bilan o'yinda Shavkat Salomov tomonidan urilgan gol klub uchun yubiley golga aylandi. "Buxoro" yangi mavsumda 11ta g'alabani qo'lga kiritsa g'alabalar soni 300taga etadi, 20 ochkodan so'ng 1000-ochko qo'lga kiritiladi.

Oliy ligani tark etgan “Andijon” jamoasi bu yil o'z ochkolarini 800tadan oshirib oldi. "Burgutlar" oliy ligaga qaytishganidan keyin 700-o'yinni o'tkazishadi va 950-golni urishga urinib ko'rishadi.

Jizzaxning “So'g'diyona” klubi o'zining yubiley 600-uchrashuvni o'tkazdi. 15-turda "Qizilqum" bilan bahsda jamoa 100-durangni qayd etdi. 8-turda "Sho'rtan"dan qabul qilingan mag'lubiyat "So'g'diyona"ning oliy liga tarixidagi 300-mag'lubiyati bo'ldi. 9-turda "Olmaliq" bilan o'yinda raqib posboni Umid Xonimqulov tomonidan urilgan avtogol gol jamoaning yubiley 800-goli bo'ldi.

2016 yil “Metallurg”ning 550-uchrashuvi kuzatildi va 25 yillik umumiy ro'yxatda ikki pog'onada yuqorilab 9-o'ringa chiqib oldi. Yana uchta goldan so'ng bekobodliklarning yubiley 700-goli uriladi.

“Qizilqum” bu yil o'z ochkolarini 650tadan oshirib oldi. 4-turda “Obod” bilan bahsda Ilhom Yunusov tomonidan urilgan gol klubning 600-goli bo'lib tarixga kirdi. 2017 yilda “Qizilqum” 500-o'yinni o'tkazadi, bundan tashqari 200-g'alabani qo'lga kiritishi, 100-durangini qayd etishi mumkin.

“Bunyodkor” klubi bu yil oliy ligadagi 10-mavsumini o'tkazdi va ochkolarini 650tadan oshirib oldi. 2016 yilda klub o'zining 200-g'alabasiga erishdi. Bu yubiley 20-turda “Olmaliq” bilan bahsda qayd etildi. Bundan tashqari duranlar soni 50taga etdi. Yangi yilda “qaldirg'ochlar” 300-uchrashuvda maydonga tushishadi.

“Mashal” klubi bu yil oliy ligadagi 450-uchrashuvni o'tkazdi. Keyingi yil jamoa g'alabalarini 200taga etkazib olishi va 600-golini urishi mumkin.

Ilk bor O'zbekistoni chempioni bo'lgan “Lokomotiv” bu yil o'z ochkolarini 550tadan oshirib oldi. 13-turdan o'rin olgan "Qizilqum" bilan bahsda Temurxo'ja Abduxoliqov tomonidan urilgan gol "temiryo'lchilar" uchun oliy ligadagi yubiley 500-gol bo'ldi. Keyingi yil jamoa 600-golini urishi va ochkolarini 600tadan oshirishi mumkin.

“Qo'qon-1912” bu yil ochkolari sonini 400tadan oshirib oldi. 20-turda "Nasaf" bilan o'yinda Suxrob Berdiev tomonidan urilgan gol jamoaning oliy ligadagi yubiley 450-goli bo'lib tarixda qoldi. Keyingi yil klubning duranglari soni 50taga etishi mumkin.

Bu yil “Sho'rtan”ning o'yinlari soni 300dan, ochkolari soni esa 350dan oshdi. G'ulom Rahmonov 18-turda “Metallurg” bilan o'yinda jamoaning oliy ligadagi umumiy gollarini 350taga etkazdi. Yakunlangan mavsumda G'uzor klubi darvozasiga 500-gol urildi. 25-turda "Andijon" ustidan qo'lga kiritilgan g'alaba jamoaning yubiley 100-g'alabasi bo'ldi.

“Olmaliq” klubi 30-turda “Qo'qon-1912” bilan bahsda 250-uchrashuvni o'tkazdi. 21-turda “Navbahor” bilan o'yinda Muhammad Isaev “Olmaliq”ning yubiley 350-golini urdi. Bu yil jamoa darvozasidan 350-gol o'rin oldi. 27-turda "Andijon" bilan bahsda yubiley 50-durang kuzatildi. Bundan tashqari klubning ochkolari soni 300dan oshdi. Keyingi yil jamooa 100-g'alabasiga erishishi, 400-golni o'tkazishi va ochkolarini 350taga etkazib olishi mumkin.

Oliy ligada ilk bor ishtirok etgan Toshkentning "Obod" klubining elitadagi birinchi golini 4-turda "Qizilqum" bilan o'yinda Pavel Solomin urishga muvaffaq bo'ldi. Jamoa debyut mavsumda 25ta gol urdi. "Sho'rtan" bilan o'yinda "Obod" darvozasiga 50-gol urildi. Keyingi yil klub 10-g'alabasini qo'lga kiritishi, 10-durangini qayd etishi, 50-golini urishi va ochkolari sonini 50taga etkazib olishi mumkin.

Narzulla Saydullaev tayyorladi

#	Jamoalar	O'	YU	D	M	T-N	O
1	Paxtakor (Toshkent)	740	504	118	118	1678-629	1630
2	Neftchi (Farg'ona)	740	462	106	172	1522-766	1492
3	Navbahor (Namangan)	740	353	137	250	1275-913	1196
4	Nasaf (Qarshi)	588	330	112	146	1069-665	1102
5	Buxoro (Buxoro)	714	289	113	312	1000-1083	980
6	Andijon (Andijon)	688	226	134	328	942-1142	812
7	Dinamo (Samarqand)	650	227	111	312	807-952	792
8	So'g'diyona (Jizzax)	628	214	104	310	814-1061	746
9	Metallurg (Bekobod)	554	181	114	259	697-890	657
10	Qizilqum (Zarafshon)	494	186	97	211	634-710	655
11	Bunyodkor (Toshkent)	280	201	50	29	553-147	653
12	Mashal (Muborak)	456	189	80	187	590-628	647
13	Traktor (Toshkent)	490	178	87	225	684-814	621
14	Do'stlik (Toshkent viloyati)	346	169	52	125	669-532	559
15	Lokomotiv (Toshkent)	336	162	67	107	542-408	553
16	Qo'qon 1912 (Qo'qon)	340	123	42	175	462-654	411
17	Surxon (Termiz)	374	109	66	199	461-726	393
18	MHSK (Toshkent)	216	106	44	66	420-335	362
19	Sho'rtan (G'uzor)	310	101	51	158	365-514	354
20	Olmaliq (Olmaliq)	250	87	50	113	359-391	311
21	Xorazm (Urganch)	248	62	44	142	281-518	230
22	Zarafshon (Navoiy)	196	60	37	99	263-355	217
23	Yangier (Yangier)	216	56	37	123	266-385	205
24	Turon (Nukus)	164	44	23	97	171-329	155
25	Kosonsoy (Kosonsoy)	156	40	25	91	171-305	145
26	Guliston (Guliston)	154	34	17	103	142-340	119
27	Atlaschi (Marg'ilon)	124	34	16	74	149-280	118
28	Chirchiq (Chirchiq)	122	26	25	71	130-240	103
29	To'palang (Sariosiyo)	86	28	12	46	103-146	96
30	Kimyogar (Chirchiq)	104	25	21	58	113-193	96
31	Akademiya (Toshkent)	34	16	11	7	72-45	59
32	Semurg' (Angren)	72	15	12	45	99-200	57
33	Cementchi (Quvasoy)	30	8	7	15	39-64	31
34	Chilonzor (Toshkent)	34	8	6	20	51-70	30
35	Shahrixonchi (Shahrixon)	32	7	7	18	25-67	28
36	Obod (Toshkent)	30	6	6	18	25-51	24
37	Vobkent (Buxoro)	30	3	6	21	23-70	15
38	O'z-DongJu (Andijon)	30	2	7	21	17-65	13

Chempionatlarimizning 25 yillik umumiy jadvali haqida