«Пахтакор» гарчи кетма-кет ютқазган бўлсада жамоадаги ғолиблик руҳи, менталитетидан келиб чиқсак, чемпионлик пойгасида табиийки қатнашади. Жамоага иштиёқ ва азарт қайтса яна аввалги салобатли «Пахтакор»га айланадигандек.

Лекин келаси тур жамоа учун финалга тенг. Чунки «Навбаҳор»нинг эҳтимолий ғалабаси «Пахтакор»ни чемпионлик пойгасидан норасман чиқариб юбориш билан биргаликда, жамоанинг асл муаммосини кўрсатиб бериши ҳам мумкин.

Ҳозирча муаммо футболчиларда ёнмаётган учқун, йўқолган иштиёқ ва азарт билан боғлиққа ўхшамоқда. Муҳим ва ўта жиддий баҳс. Йўқотишларсиз кетаётган ва лига пешқадамига айланган «Навбаҳор»га қарши ўйинга мураббий жамоада йўқолган иштиёқни «уйғотиши» керак. Акс ҳолда муаммо бошқа жойдан пайдо бўлиши ва «Пахтакор» дастлабки 3 ўйиндаёқ етакчидан 9 очко ортга қолиб кетиши ортидан саволлар манзили ўзгариб қолади.

Ҳозирча «Пахтакор» Шацких бошқарувида «Навбаҳор»ни ютгани йўқ. Буни амалга ошириш учун эса бундан қулай фурсат Максда бўлмаслиги мумкин.

Суперлиганинг 3-тури нафақат «Пахтакор» ёки «Навбаҳор» учун жуда муҳим, балки лигадаги асосий интрига чемпионлик пойгасининг бурилиш нуқтасига айланиши мумкин.

Чунки «Навбаҳор» агарда «Пахтакор»ни Тошкентда мағлуб этса, унда чемпионлик вазифаси вақт масаласи айланади. Чунки чемпионлик йўлида «Навбаҳор»га фақатгина «Пахтакор» чинакам рақобат қилишга қодир ёки аксинча тўғрироғи.

Бронза медали учун кураш эса анча кескин кечади ва бунда ҳозирги «Бунёдкор» яна курашга қайтиш потенциалига эгадек таассурот қолдирмоқда. «Нефтчи» ҳам медаллар учун курашга қайтгандек. «Насаф» ёки ОКМК ҳам табиийки учликка курашади. Аммо бу учликнинг янги ва шахсий фикримча яққол фаворити пайдо бўлди, бу — «Олимпик».

Бу шунчаки илк хулосалар. Чемпионат узоқ ва ким учун мавсум қандай давом этишига ҳам кўп нарса боғлиқ. Лекин ҳаёлда айланаётган фикрларимни шу ерда қолдиргим келди.

Ҳамма нарса тугагач вазиятга қараб таҳлил қилиш, фикр билдиришдан осони йўқ. Лекин иссиғида таҳлил қилиб, имкониятларни чамалаш ва тўғри баҳолаш эса энг қийини.

Кичик тажриба ва жамоаларнинг ҳозирги салоҳияти шундай хулосага бермоқда.

Ҳа айтганча, лигада жон сақлаш учун пастки олтилик «Сурхон», «Металлург», «Қизилқум», «Турон», «Сўғдиёна» ва «Бухоро» ўртасида яхшигина рақобат бўлади.

Шаҳбоз Беғамов

«Чемпионлик кураши «Пахтакор» ва «Навбаҳор» ўртасида кечади, бронза медали учун эса асосий фаворит — «Олимпик»