Yodingizda bo'lsa, London olimpiadasi saralash uchrashuvining so'nggi turida terma jamoamiz “Jar”da BAAni qabul qilgandi. Mazkur o'yinda terma jamoamizga hammadan ham ko'ra ishqibozlarning daldasi kerak edi. Ammo o'yinga yaqin qolganda ham stadionning yarmi to'lmagan, baxtimizga so'nggi daqiqalarda tashqarida chipta ololmay to'planib qolgan muxlislarning kirishi natijasida haqiqiy futbol hayqirig'i boshlangandi.

Endi agar... Agar Iordaniyada kerakli natijaga erisha olmasak, kim 35000 so'mga chipta oladi? Chetroqdan 20000 so'mga kim tomosha qiladi? Bu kassa narxi, kim kafil ularni olib sotarlar qo'liga chiqib ketmasligiga? Hech kim! Olib sotarlar hech kimdan qo'rqishmaydi, yo'q to'xtang, qo'rqishadi, chiptalarni sota olmaslikdan. Ammo qimmat chiptaning narxi vijdondan arzon... Chiptalar 5 sentyabr kuni sotuvga chiqadi. Mana ko'rasiz, markaziy sektorlarni qidirib o'tirmang. Agar 6 sentyabr kuni g'alaba qozonsak yoki durang bo'lsa ularning soni keskin oshadi va ora sira kassada paydo bo'ladi. Agar, bu agarni aytishni ham istamayman, ammo agar yutqazib qo'ysak, markaziy sektorlarni o'z narxida 7 sentyabr kuni istaganingizcha xarid qiling. Mana shu olib sotarlarning kasriga terma jamoa futbolchilarini qarg'aganlar kam deysizmi? Etarlicha topiladi!

Chipta narxini 5-7-10 000 so'm qilib qo'ying, muxlislar stadionga tushib YORVORSINLAR! O'zbekiston, O'zbekiston deb baqirib Iordaniya futbolchilarini MONDRAJga solib qo'ysinlar. Biz ham ishqiboz bo'lganmiz, biz ham baqirganmiz, ammo hozirgi ishqibozlardan farqli ravishda biz mazza qilib, asablarimizni o'yinga qadar buzib qo'ymay stadionga kirganmiz.

O'zbekiston – Quvayt uchrashuvini eslaysizmi. Hammasi joyida. Stadion to'la muxlis, O'zbekiston mag'lubiyatga uchrayapti. Ana boshlandi 1:2, 2:2... O'zbekiston uyg'ondi, stadionga tashrif buyurgan muxlis "bo'kiryapti". Hammamiz O'zbekistoooooonimizni g'alaba qozonishini istayapmiz. Baqiryapmiz, ana Qosimov burchak zarbasini amalga oshirdi, Soliev, GOLLLLLLL!!!! Stadion larzaga keldi, Kusto hayratda! Quvayt futbolchilari bosimga chiday olishmadi. Endi o'ylang, yaxshilab o'ylang! Bu safargi o'yinda mag'lubiyatga uchrab tursak muxlislar yordamga kelishadimi? Olgan chiptasiga norozi bo'lib so'kinib o'tirishadi, "futbolinggayam" deydi kerak bo'lsa! Agar asl ishqibozni rozi qilib stadionga olib kiraylik, mana ko'rasiz, bor-u, baqirib enasini ko'rsatib yuboramiz! Livanni terma jamoamiz yutdi deyayotganlar adashishadi! Agar o'sha kuni muxlislar bir tanu, bir jon bo'lib O'zbekiston (!), O'zbekiston (!) deb hayqirishmaganida, golni biz emas Livan urib ketardi.

Mayli chipta narxi elon qilinib bo'ldi, endi kech. Ammo olib sotarlar qo'liga o'tib ketmasligini taminlash uchun kech emas! Bir safar Vatan manfaati yo'lida jig'ildonga erk bermang! Agar Siz shu Vatan farzandi bo'lsangiz va shu maqolani o'qiyotgan bo'lsangiz, Vatan ishqibozlari nomidan so'rayman, bir gal nafsingizni tiying!

Nodirxo'ja Yuldashev.

Chipta biroz qimmat emasmi?