Joriy yildan etiboran O'zbekiston Professional futbol ligasi Pro liga klublarining ham barchasini mazkur jarayonga jalb etgan holda klublarimizning umumiy infratuzilmasini bosqichma-bosqich yaxshilab borish, Pro liga ishtirokchilarini tashkiliy tuzilma jihatidan Coca Cola Superliga vakillariga yaqinlashtirish amaliyotini joriy etmoqda.

Licenziyalash Reglamentiga asosan klub uy o'yinlarini qabul qiladigan stadion OFK va O'zPFL tasarrufidagi klublar musobaqalarini o'tkazadigan stadionlar uchun maxsus qoidalarda ko'rsatilgan talablarga javob berishi shart sanaladi.

Xususan, Stadionlar to'g'risida Nizomda belgilangangan eng muhim jihatlardan biri – bu stadionda qoniqarli yoritish tizimining taminlangani sanaladi. Zero yorug'lik darajasining yuqori bo'lishi o'yinni bevosita stadiondan kuzatadigan muxlislarga, shuningdek maydondagi vaziyatlarni yoritib boruvchi fotosuratchilarga qulaylik yaratadi, qolaversa uchrashuv teletranslyaciyasi yanada sifatli bo'lishini taminlaydi.

Stadionlar to'g'risida Nizomda stadion minimal talab qilingan gorizontal yorug'lik darajasi kamida 1200 lyuks bo'lgan yoritish tizimi bilan jihozlangan bo'lishi lozim ekani belgilangan.

Mavsum oldidan stadionning yoritish guvohnomasi taqdim etiladi. Lekin O'zPFL mavsum davomida ham stadionlar yoritish tizimi talab darajasida saqlanib turganini tekshirib boradi. Coca Cola Superliganing ortda qolgan turlari davomida yuqori divizionimiz klublarining uy o'yinlarini o'tkazadigan stadionlarida yoritish tizimini o'lchash ishlari olib borildi.

Unga ko'ra, yorug'lik darajasi eng baland yoritish tizimiga ega stadion “Bunyodkor” o'yingohi bo'lib turibdi. “Bunyodkor” futbol klubi uy o'yinlari o'tkaziladigan stadionda yorug'lik darajasi o'rtacha 1900 lyuksni tashkil etmoqda.

Shuningdek, Navoiydagi “Yoshlar” sport majmuasi, “Buxoro” stadioni, Qarshi va Namangandagi “Markaziy” o'yingohlar, “So'g'diyona”, “Paxtakor” va “Lokomotiv” stadionlarida ham yorug'lik darajasi talab darajasida.

Superliga klublari stadionlari yoritish tizimi ko'rsatkichlari

#	Klub	Stadion	O'rtacha LUX o'lchami	O'lchangan sana
1	BUNYODKOR	“Bunyodkor”	1900	25.06.2020
2	QIZILQUM	“Yoshlar” sport majmuasi	1700	13.06.2020
3	BUXORO	“Buxoro”	1600	25.06.2020
4	NASAF	“Markaziy”	1500	14.06.2020
5	NAVBAHOR	“Markaziy”	1500	19.06.2020
6	SO'G'DIYONA	“So'g'diyona”	1500	14.06.2020
7	PAXTAKOR	“Paxtakor”	1400	14.06.2020
8	LOKOMOTIV	“Lokomotiv”	1300	17.06.2020
9	AGMK	OKMK sport majmuasi	1000	19.06.2020
10	METALLURG	“Metallurg”	900	26.06.2020
11	MASH'AL	“B. Vafoev”	200	15.06.2020
12	ANDIJON	“Sog'lom avlod”	200	20.06.2020
13	SURXON	“Surxon” sport majmuasi	100	14.06.2020
14	QO'QON-1912	“Markaziy”	100	18.06.2020

Olmaliq va Bekoboddagi stadionlar yoritish tizimi esa uzog'i bilan bir yil muddatga beriladigan yoritish guvohnomasida taqdim etilgan ko'rsatkichlardan biroz pastlagani, yoritish tizimi qayta sozlanishi lozim ekani malum bo'ldi. Zero maydondagi 15 ta nuqtada olib borilgan o'lchash ishlari yorug'lik maydonning turli nuqtalariga turlicha tushayotganini ko'rsatdi.

Muborakdagi “Bahrom Vafoev” nomli stadion, Andijondagi “Sog'lom avlod” stadioni, Termizdagi “Surxon” sport majmuasi hamda Qo'qondagi “Markaziy” o'yingohlar yoritish tizimi esa talab darajasidan ancha past. Bu borada mazkur stadionlarda uy uchrashuvlarini o'tkazadigan klublarga yoritish tizimini talab darajasiga etkazish lozim ekani malum qilindi.

Shu o'rinda alohida qayd etish joizki, Osiyo Futbol Konfederaciyasi 2021 yildan boshlab qita miqiyosida tashkil etiladigan musobaqalar o'tadigan stadionlarda yoritish tizimini yangi bosqichga olib chiqish borasida ish olib bormoqda.

Xususan, endilikda Osiyo Chempionlar ligasi guruh bosqichi o'yinlarini qabul qiladigan stadionlarda yorug'lik darajasi 1800 lyuksdan kam bo'lmasligi talab etiladi. Bu ko'rsatkich OFK kubogi guruh bosqichida 1400 lyuksni tashkil qiladi.

Shu boisdan xalqaro musobaqalarda qatnashishni o'z oldiga maqsad qilgan klublarimiz ham kelasi mavsumga qadar stadion yoritish tizimini yanada yaxshilash bo'yicha ish olib borishlari lozim bo'ladi.

Kelasi mavsumdan etiboran yorug'lik darajasi 1200 lyuksdan kam bo'lgan stadionlarda uchrashuvlar o'tkazishga aslo ruxsat berilmaydi.

Zoxirjon Akramxonov, Klublarni licenziyalash va rivojlantirish bo'limi boshlig'i

Jahongir Rahmatullaev, Sport inshootlari bo'yicha bosh mutaxassis

Coca Cola Superligasi. Stadionlar yoritish tizimi qanday? "Surxon" va "Qo'qon-1912" eng so'nggi o'rinda