Coca Cola Superliga. 9-tur
12 iyul, yakshanba
ANDIJON – SURXON
Hakamlar: Ahrol Risqullaev, Rishat Nugmanov, Hasan Nabiev, To'rabek Suyunov
Nazoratchi: Sulton Zaylobiddinov
Komissar: Laziz Qo'chqorov

So'nggi uchta turda uch marta durang o'ynagan "Andijon" olti turdan buyon g'alaba nimaligini bilmayotgan "Surxon"ni qabul qiladi. Termizliklar ketma-ket beshinchi o'yinni safarda o'tkazishadi. Ikkala klub safida to'purar 3tadan gol urgan. Termizliklar safida Aleksandr Kasyan, andijonliklar safida Jamshid Hasanov.

“Andijon” va “Surxon” jamoalari shu kungacha 26 marotaba o'zaro bahs olib borgan. O'tkazilgan 26 ta uchrashuvning 15 tasida “Andijon” jamoasi g'olib chiqqan bo'lsa, “Surxon” jamoasi 6 ta uchrashuvda g'alaba qozongan. Qolgan 5 ta uchrashuv esa durang natijasi bilan yakunlangan. To'plar nisbati 56-33 “Andijon” jamoasi foydasiga. "Surxon" Andijonda faqat bir marta g'alabaga erishgan (1994 yil), yani termizliklar 26 yildan buyon safarda bu jamoani mag'lub eta olishmayapti.

METALLURG – SO'G'DIYONA
Hakamlar: Viktor Serazitdinov, Abduhamidullo Rasulov, Avazbek Abdullaev, Abdurashid Xudoyberganov
Nazoratchi: Baxtiyor Tog'aev
Komissar: Sardor Qudratullaev

O'tgan tur bu mavsum ilk bor raqib darvozasiga gol ura olmagan "Metallurg" Bekobodda safardagi 4ta o'yinning 1tasida g'alabaga erishgan "So'g'diyona"ni mehmon qiladi. "Metallurg"da 5ta gol urgan Stanislav Andreev to'purar bo'lsa, "So'g'diyona" safida 4ta to'p kiritgan Shohruz Norxonov to'purar hisoblanadi.

“Metallurg” va “So'g'diyona” jamoalari bugungacha kuchlilar safida o'zaro 36 ta o'yin o'tkazishgan. Shulardan 14 tasida bekobodliklar, 15 tasida jizzaxliklar g'alaba qozonishgan. 7 ta uchrashuvda esa durang natija qayd etilgan. Kiritilgan va o'tkazib yuborilgan to'plar farqi jizzaxliklar foydasiga – 51:49.

13 iyul, dushanba
NAVBAHOR – QIZILQUM
Hakamlar: Jasur Muxtorov, Ruslan Serazitdinov, Daler Tilloev, Doston Mirzaraimov
Nazoratchi: Andrey Klepikov
Komissar: Ramil Ilyasov

O'z maydonida 3ta o'yinning barchasida g'alaba qozongan va umuman gol o'tkazmagan "Navbahor" Namanganda bu mavsum umuman g'alaba nashidasini sura olmagan "Qizilqum" bilan kuch sinashadi.

Mazkur klublar 40 marta o'zaro ro'baro' bo'lishgan. Ushbu bahslarda “Navbahor” 15 marta, navoiyliklar esa 14 marta g'alaba nashidasini surishgan, 11ta uchrashuvda esa durang qayd etilgan. To'plar nisbati bo'yicha ustunlik vakillarimiz tomonida - 52–46. O'zaro o'yinlarda “lochinlar” 56, “Qizilqum” esa 53 ochkoni qo'lga kiritgan. Ushbu klublarning Namanganda bo'lib o'tgan 20ta uchrashuvidan 10 tasida “lochinlar” zafar quchishgan, 6ta o'yinda esa durang natija qayd etilgan, 4ta bahsda navoiyliklar g'alaba qozonishgan.

PAXTAKOR – AGMK
Hakamlar: Sherzod Qosimov, Alisher Usmonov, Sanjar Shoyusupov, Rustam Choriev
Nazoratchi: Vladislav Ceytlin
Komissar: Shohruh Said

Bu mavsum o'z uyidagi 5ta o'yinda 5ta g'alabaga erishgan "Paxtakor" 2020 yilgi O'zbekiston chempionatida umuman mag'lub bo'lmagan yagona jamoa AGMKni qabul qiladi. "Sherlar"ning g'alabali seriyasi 4ta o'yinga etdi, AGMK esa 5ta o'yindan buyon g'alaba qozonib kelmoqda.

Bu ikki jamoa chempionatlar tarixida 24 uchrashuvda o'zaro o'yin o'tkazishgan. 18 bellashuv "Sherlar" g'alabasi bilan yakunlangan. 2 o'yin durang bilan tugagan va 4 bor AGMK muvaffaqiyatga erishgan. Toshkentda AGMK bir marta, 2013 yil 2:1 hisobida zafar quchgan, yani 7 yildan buyon olmaliqliklar bu raqibni safarda mag'lub eta olishmayapti. O'z maydonida "Paxtakor" 9 g'alaba, 2 durang va 1 mag'lubiyatni qayd etgan.

14 iyul, seshanba
LOKOMOTIV – MASH'AL
Hakamlar: Rahimbek Karimov, Husniddin Shodmonov, Damir Iskanderov, Adhamjon Ergashev
Nazoratchi: Mamur Saidqosimov
Komissar: Ahmed Tillaev

Oxirgi ikki o'yinni o'z maydonida o'tkazib ikkita g'alabaga erishgan "Lokomotiv" ketma-ket uch turdan buyon safarda o'ynab uch marta mag'lub bo'lgan "Mashal"ni qabul qiladi.

“Lokomotiv” va “Mashal” jamoalari ichki chempionatimiz doirasida shu paytga qadar 24 marta o'zaro to'qnash kelishgan. O'zaro o'yinlardagi ustunlik – “Lokomotiv” futbolchilari tomonida. “Lokomotiv” o'tkazilgan bellashuvlarning 13 tasini o'z foydasiga hal eta olgan. “Mashal” vakillari esa 9 ta o'yinda g'alabaga erishishgan. Ikki bora esa jamoalar durang o'ynashgan. “Lokomotiv” shu vaqtgacha “Mashal” darvozasini o'zaro o'yinlarda 33 marta ishg'ol etgan. O'z darvozasidan esa 27 ta gol o'tkazib yuborgan. "Gazchilar” “temiryo'lchilar”ni so'nggi bor 2010 yilning avgustida mag'lub etishgan. O'shanda “Mashal” o'yinchilari toshkentliklarni 2:0 hisobida enggandi. Yani 10 yildan buyon Muborak klubi "Lokomotiv"ni mag'lub eta olmay kelmoqda.

QO'QON-1912 – NASAF
Hakamlar: Vadim Agishev, Rasuljon Fozilov, Maksim Nexochin, Husan Muzaffarov
Nazoratchi: Marat Ismoilov
Komissar: Muhammad Sodiq Sodiq-Oxunov

O'z uyidagi 5ta o'yinning barchasida raqiblarni mag'lub etgan va o'z darvozasidan atigi bitta gol o'tkazib yuborgan "Qo'qon-1912" o'tgan tur 4 o'yinlik g'alabasiz seriyasiga chek qo'ygan "Nasaf"ni qabul qiladi.

Bu jamoalar shu paytga qadar chempionat doirasida 22 marta to'qnash kelishgan. “Nasaf” o'yinlarning 14 tasida zafar quchgan, 5 ta bahsda qo'qonliklarning qo'li baland kelgan. Uchta uchrashuvda durang natija qayd etilgan. To'plar nisbati – 40-22, “Nasaf” foydasiga. "Nasaf" "Qo'qon-1912" maydonidagi oxirgi uchta o'yinda g'alaba qozona olmagan.

BUXORO – BUNYODKOR
Hakamlar: Ravshan Abduvohidov, Zufar Eliboev, Farhod Usmonov, Naim Qosimov
Nazoratchi: Sardor Najafaliev
Komissar: Jahongir Rahmatullaev

2020 yilgi Coca Cola Superligasida g'alaba qozona olmagan "Buxoro" bu tur 3ta o'yindan buyon mag'lubiyat nimaligini bilmay kelayotgan "Bunyodkor" bilan bellashadi.

Bu jamoalar hozirga qadar 26 bor o'zaro o'yin o'tkazishgan. Etiborlisi, shu kungacha o'tkazilgan 19ta bahsda “qaldirg'ochlar” g'alaba qozonganlar. 6ta uchrashuvda durang natija qayd etilgan. Buxoroliklar hisobida birgina g'alaba bor. To'plar farqi – 62:14.

Coca Cola Superligasi. "Paxtakor" - AGMK va 9-turning boshqa o'yinlari uchun prevyu