Uchrashuvdan keyin "Erem" bosh murabbiyi Daniyar Abduraimovning fikrlari bilan qiziqdik.

- Bugun biz oxirgi 6 kundagi to'rtinchi o'yinni o'tkazdik. Klublar o'rtasidagi Osiyo chempionati oldidan rejalashtirilgan nazorat o'yinlarimiz shu bilan nihoyasiga etdi. 4 o'yindan faqat bittasida g'alaba qozondik va uchtasida engildik. Demak, to'g'rilashimiz kerak bo'lgan jihatlar bor. Bu biz uchun juda foydali o'yin bo'ldi. O'zbekiston terma jamoasida do'stlarimiz Bahodir (Ahmedov) va Nodir (Eliboev) murabbiylik qilishmoqda. O'yin uchun ularga ham minnatdorchilik bildiraman.

- Klublar o'rtasidagi Osiyo chempionatiga shu tarkib bilan borasizlarmi?

- Toshkentga kelish oldidan ikki nafar asosiy o'yinchimizni yo'qotdik. Sardorimiz Adelat Qultaev va Dilshod Qadirov jarohat olishdi. Ularning har ikkisi milliy terma jamoa azosi ham hisoblanishadi. Bu yakuniy tarkibimiz. Oldindagi musobaqa uchun tarkibimizga uzog'i bitta o'yinchi kelib qo'shilishi mumkin.

- O'zbekiston terma jamoasi o'yini haqida fikringiz?

- O'zim 12 yil oldin O'zbekistonda "Stroitel Zarafshon" jamoasida o'ynaganman. Shu sabab, o'zbek futzali haqida yaxshi bilaman. O'shanda ham sizlarda futzal yaxshi darajada edi. Bu yig'inga murabbiyingiz yosh o'yinchilarni chaqiribdi. Ikki o'yindan kelib chiqib aytishim mumkin-ki, murabbiylar yaxshi ishlamoqda. Bu yosh futzalchilar asosiy tarkibdagilarga yaqin vaqtlarda raqobat qila olishadi. Bahodir Ahmedov va Nodir Eliboev ispaniyalik Xose Mariya Mendezdan ko'p narsa o'rganishgani ko'rinib turibdi.

Daniyar Abduraimov: "Yosh o'yinchilaringiz yaqin orada asosiy tarkibdagilarga raqobat qila olishadi"