- Davron aka, dastlabki yirik g'alaba bilan tabriklaymiz. O'yin va natijadan qoniqdingizmi?

- Avvalambor, barchani ulug' ayyom Ramazon hayiti bilan tabriklayman. Ayni damda Jahon Chempionati bahslari bo'layotganiga qaramay, "Dinamo" jamoasini qo'llab-quvvatlash uchun stadionga kelgan barcha muxlislarga rahmat deyman. Aynan ularning olqishlari "Dinamo"ning yirik hisobdagi g'alabasi uchun juda muhim bo'ldi.

O'yin borasidagi to'xtaladigan bo'lsam, bugun yirik 3:0 hisobidagi g'alabani qo'lga kiritgan bo'lsakda, "Istiqlol" jamoasi o'yini menda yaxshi taassurot qoldirdi. Bu g'alaba yutuqlarimizdan ko'ra, ko'proq kamchiliklarimizni yaqqol ko'rsatib berdi. Hisobdan qoniqdim, xatolarni esa tahlil qilib, o'rganamiz. Oldingi o'yinlarda ikki marta 3:2 hisobida alamli mag'lubiyatga uchraganimiz, ayniqsa so'nggi daqiqalarda gol o'tkazib yuborganimiz bois, jamoadan bitta gol urib, kurashni to'xtatmaslikni tayinlagandim. Jamoaning gol urib, ruhan o'yinni tashlab yuborishi menga umuman yoqmaydi, men oxirigacha kurashuvchanlik, jangovarlikni so'rayman. Baxtimizga, bugun maydonga tushirilgan yosh posbonimiz Shohruh Raimov ishonchni oqlab, hisob 1:0 vaqtida qiyin vaziyatda muqarrar goldan jamoani qutqarib qoldi. Bu posbonimiz ham raqobatga kirishib, jamoamiz faqat bitta darvozabonga bog'lanib qolmaganligini ko'rsatdi. Ashurov, Almosjonov va Yunusovning gollaridan keyin ishonchli g'alabaga erishdik.

- Ertadan PFLda transferlarga ruxsat beriladi. Navbatdagi turda "Mashal"ga qarshi muhim o'yin oldidan tarkibda yangi nomlarni ko'rish mumkinmi?

- Albatta, barcha tarkibni kuchaytiradigan paytda qo'limizni qovushtirib o'tirishimiz yaramaydi. Ro'yxatga qo'shish ochilishi bilan Xudo xohlasa, "Mashal"ga qarshi o'yingacha tarkibimizda kamida 2-3 nafar yangi futbolchi bo'lishini o'zim ham kutayapman. Bu raqib chempionat peshqadami. Ularga qarshi yaxshi tayyorgarlik ko'ramiz. Bugungi g'alaba ham yigitlarimiz ruhiy holatiga yaxshi tasir qilishi kerak. Yigitlarimiz barcha ko'rsatmalarni to'g'ri bajarishsa, umid qilamanki hammasi yaxshi bo'ladi.

- Davralar oralig'ida qay daraja o'zgarishlar bo'ladi?

- Shubhasiz, maqsad sari o'zgarishlarga qo'l urishimiz shart. Biz ham boshqa raqiblarimiz singari tarkibni kuchaytirish uchun imkon boricha harakat qilamiz. Shaxsan o'zim tez orada jangovar, hujumkor o'yin namoyish etadigan "Dinamo"ni ko'rmoqchiman. Bugun qo'l ostimdagi "Dinamo"ni yomon jamoa demoqchi emasman, shaxsan o'zim shijoatli, kurashuvchan jamoani ko'rmoqchiman. Buning uchun tarkibda o'zgarishlar bo'ladi.

- Selekciya jarayonida aynan qaysi chiziqlarga ko'proq etibor beriladi?

- Barcha chiziqlarni imkon darajasida kuchaytirishimiz lozim. Bugungi o'yingacha to'plar nisbatiga etibor qaratsak, 13 o'yinda 18ta gol o'tkazib yuborgan, 15ta gol urgandik. Yuqori maqsadni ko'zlagan jamoa uchun bu juda yomon natija. Aslida ko'p gol urib, kam o'tkazishimiz shart. Meni quvontirayotgan yagona jihat, jamoamiz nihoyat oxirgi o'yinlarda 2-3tadan gol urayotganidir. Mavsum boshida bittadan ko'p gol urolmayotgandik. Ammo, oxirgi 3ta o'yinda 7ta gol urib, bor yo'g'i 3 ochko olish juda alamli. Undan ko'ra, har o'yinda bittadan gol urib yutish men uchun afzalroq. Sababi hozir natija muhimroq. Biz har qanday holatda ham kurashishda davom etamiz. Ikkinchi davrada principial raqiblarga qarshi bahslarda ijobiy natijalarga erishsak, Superligaga chiqish uchun imkoniyatimiz bor. Takrorlayman, "Dinamo" oxirigacha kurashadi.

Usmon Ibodov suhbatlashdi

Davron Fayziev: "Tez orada jangovar "Dinamo"ni ko'rmoqchiman"