Шу муносабат билан амалга ошириладиган сўнгги трансферлар билан таништириб борамиз.

ЯНГИЛАШ

Тошкент вақти билан соат 21:00да Англияда трансфер бозори расман ёпилди. Энди АПЛ клублари 31 августга қадар фақат ўз футболчиларини бошқа чемпионат клубига сотишлари мумкин холос. Январь ойига қадар янги футболчини сотиб олиб бўлмайди.

- Англияда трансфер ойнасининг сўнгги дақиқаларида "Эвертон" 3та харидни амалга оширган бир пайтда "Тоттенхэм" АПЛда 2003 йилдан буён ёзги трансфер бозорида умуман футболчи сотиб олмаган биринчи клуб бўлди.

- Skysports дан навбатдаги хабар. "Фулхэм" "Марсель" ярим ҳимоячиси Андре Франк Ангиссани 30 миллион фунт стерлинг эвазига сотиб олди.

- Расмий хабар. "Эвертон" нималар қилаяпти? Бироз олдин Йерри Мина ва Бернардни ўз сафига қўшиб олган "Эвертон" энди "Барселона" ярим ҳимоячиси Андре Гомешни ижарага олди.

- Расмий хабар. Карлос Санчес кутилганидек "Вест Хэм" аъзосига айланди. "Фиорентина"дан келган футболчи 2 йиллик шартномага имзо чекди.

- Расмий хабар. "Хаддерсфилд" Бельгия U21 терма жамоаси ва "Монпелье" аъзоси Исак Мбензани ўз сафига қўшиб олди.

- Skysports хабарига кўра колумбиялик ҳимоячи Карлос Санчес "Вест Хэм" сафида тиббий кўрикдан ўтди.

- "Эвертон" авжига чиқмоқда. "Барселона" ўз ҳимоячиси Йерри Минани "Эвертон"га сотганини эълон қилди. Колумбиялик футболчи учун инглиз клуби 30 миллион евро тўлайди.

- Расман: "Эвертон" бразилиялик Бернардни ўз сафига қўшиб олганини эълон қилди. Бу футболчининг "Шахтёр" билан шартнома тугаганди. Бернард Англия клуби билан 4 йиллик шартнома тузди

- "Барселона"дан Усмон Дембелени харид қилмоқчи бўлган "Арсенал"нинг режалари чиппакка чиқди. Каталония клуби "тўпчилар"нинг 100 млн. евролик таклифини рад этди.

РАСМАН: "Вулверхэмптон" "Андерлехт" ярим ҳимоячиси Леандер Дендонкерни ўз сафига қўшиб олди. Бельгиялик бир йил ижара асосида "бўрилар" шарафини ҳимоя қилади.

РАСМАН: "Бетис" ярим ҳимоячиси Виктор Камараса ижара асосида "Кардифф"га ўтди. 24 ёшли футболчининг ижараси 1 йилга мўлжалланган.

РАСМАН: "Лестер Сити" Загребнинг "Динамо" клубидан 21 ёшли Филип Бенковични сотиб олди. "Тулкилар" ушбу трансфер учун 13,05 млн. фунт сарфлашади.

РАСМАН: "Вест Хэм" "Арсенал" ҳужумчиси Лукас Пересни сотиб олди. Трансфер 4 млн. фунт эвазига амалга ошди. Футболчи ва клуб ўртасидаги битим 3 йилга мўлжалланган.

РАСМАН: "Манчестер Сити" Австралия чемпионати вакили "Мельбурн Сити" ярим ҳимоячиси Даниэль Арзанини ўз сафига қўшиб олди. Футболчи ёшлар жамоасида тўп тепади.

РАСМАН: "Челси" "Атлетик" дарвозабони Кепа Аррисабалагани харид қилди. Трансфер 72 млн. фунт (80 млн. евро) эвазига амалга ошди. Шундай қилиб Аррисабалага футбол тарихидаги энг қиммат посбонга айланди.

РАСМАН: "Челси" "Реал"дан ярим ҳимоячи Матео Ковачични ижарага олди.

РАСМАН: Тибо Куртуа "Реал"га ўтди. "Челси" ушбу трансфердан 31,5 млн. фунт ишлаб олди.

Англия Премьер-лигасида трансфер ойнаси ёпилди. Йерри Мина "Эвертон"да ва бошқа трансферлар