Ko'p yillardan buyon "Nasaf"da darvozabonlar murabbiyi bo'lib ishlab kelgan Denis Ivankov jamoani tark etdi.

Ro'ziqul Berdiev "Nasaf"ni o'z qo'liga olganidan buyon uzluksiz shtabda ishlagan Ivankov 6 yillik faoliyatidan so'ng o'zining qadrdon klubi bilan xayrlashdi.

O'zbekiston terma jamoasida ham darvozabonlar murabbiyi sifatida ishlayotgan tajribali mutaxassis "Mashal" va "Nasaf"dagi faoliyati orqali ko'pchilikka juda tanish.

Ivankov "Nasaf"dagi faoliyati davomida turli yoshdagi terma jamoalar va MTJ darajasidagi Eldorbek Suyunov, O'tkir Yusupov va Umidjon Ergashev kabi iqtidorli posbonlarni tarbiyalashga muvaffaq bo'ldi. Shuningdek, Ivankov "Nasaf"dan avval ishlagan "Mashal"dagi faoliyati davomida ham ajoyib posbonlarni chiqarishda jonbozlik ko'rsatgan. Ulardan biri Sanjar Quvvatov. O'tgan mavsumlar davomida ustoz va shogird Qarshida ham birga ishlashga muvaffaq bo'ldi. Ayni paytda Ivankovning barcha shogirdlari terma jamoalarga nomzod darvozabonlar hisoblanadi.

Murabbiyni ketishiga sabab esa terma jamoadagi faoliyat. Ivankov bor diqqat etiborini aynan mamlakatning bosh jamoasiga qaratishi bois klubdagi ishini to'xtatishga qaror qilgan. Ro'ziqul Berdiev esa terma jamoa manfaatini o'ylagan holda o'zining eng asosiy ko'makchilaridan birini qo'yib yuborishga qarshilik qilmadi. Ivankov "Nasaf" bilan do'stona tarzda xayrlashgan. "Nasaf"da esa Denis Ivankov uchun eshiklar doim ochiqligi va istalgan paytda "o'z uyi"ga qaytishi mumkinligi takidlangan.

Denis Ivankovning "Nasaf"dagi o'rnini sobiq darvozabon, bunga qadar klub akademiyasida darvozabonlar murabbiyi faoliyatini boshlagan Mixail Naumov egallashi kutilmoqda.

Denis Ivankov "Nasaf"dan ketdi