"Атлетико" - "Хетафе" 2:0

"Матрасчилар" сафида Диего Коста яна майдонга тушди. Бу унинг қайтганидан сўнг ўтказган ЛаЛигадаги илк учрашуви бўлди. Диего Костанинг майдондалиги мезбонларга қўшимча имкониятлар яратди. "Атлетико" устунлиги остида ўтган баҳсда Анхель Корреа ва Диего Коста гол уришга мувафақ бўлишди, бироқ Мадрид клуби ўйинни бир киши кам бўлиб якунлади. Форвард 62-дақиқада рақибга тирсаги билан зарба бергани учун сариқ карточка билан жазоланган эди. 6 дақиқа ўтиб Диего Коста рақиб дарвозасини ишғол қилди ва уни нишонлаш учун футболчи мухлислар олдига борди. Натижада мухлислар орасида тиқилинч юзага келди ва ҳакам бу ишни нотўғри деб ҳисоблаб, форвардга иккинчи сариқ карточкани кўрсатиб, майдондан четлатди.

"Валенсия" - "Жирона" 2:1

Каталония жамоаси бу турда турнир жадвалининг кучли учлигидан ўрин олган "Валенсия" меҳмони бўлди. "Жирона" баҳснинг 8-дақиқасидаёқ ҳисобни очди. Кристиан Порту қанотдан узатилган тўпни боши билан дарвозага жойлаб қўйди. Баҳсдаги иккинчи голни ҳам "Жирона" урди, бироқ ўз дарвозасига. Хонас Ромальо қанотдан ерлатиб узатилган тўпни қайтаришга уринди, бироқ тўп унинг оёғига тегиб дарвоза тўридан жой олди. Иккинчи бўлимнинг 48-дақиқасида Хосе Гайя чап қанотдан жарима майдончасига ёриб кирди, уни тўхтатишга уринган Пабло Маффео қўполлик ишлатди ва "Жирона" дарвозаси томон пенальти белгиланди. 11 метрлик нуқта олдига яқинлашган Даниэль Парехо хато қилмади ва ўз жамоаси учун керакли 3 очкони олиб берди.

"Лас-Пальмас" - "Эйбар" 1:2

ЛаЛиганинг 18-турида "Лас-Пальмас" "Эйбар"ни қабул қилди. Пако Хемес шогирдлари баҳснинг охирида ғалабани қўлдан бой беришди. Аввалига Хонатан Вьера пенальтидан мезбонларни ҳисобда олдинга олиб чиқди. Шогирдлари биринчи бўлимда ҳисобни тенглаштира олмаганидан ғазабланган Хосе Луис Мендилибар иккинчи бўлимда Иван Алехо ўрнига Фабиан Орельянани майдонга туширди ва бу ўзгариш фойда берди. Орельяна 73-дақиқада ҳисобни тенглаштирди, 4 дақиқадан сўнг Серхи Энрик "Лас-Пальмас" дарвозасини қўриқлаётган Леандро Чичизолани яна хафа қилди. Шундай қилиб, "Эйбар" уйга 3 очко билан қайтди.

"Севилья" - "Бетис" 3:5

Шанба кунги ўйинларни "Севилья" ҳамда "Бетис" ўртасидаги баҳс якунлаб берди. Винченцо Монтелланинг ЛаЛигадаги илк баҳси омадсиз ўтди. Ўтган тур "Реал Сосьедад"дан 3та гол ўтказиб юборган "Севилья" 18-турда "Бетис"дан 5та гол еди. Виссам Бен Йеддер, Симон Кьер ва Клемент Ленглетларнинг голлари ҳам мезбонларни мағлубиятдан қутқара олмади. Севилья дербисида "Бетис" сафидан Фабиан, Феддаль, Риза Дурмиси, Серхио Леон, Кристиан Тельолар ўз номларини таблога ёздириб қўйишди.

"Леганес" - "Реал Сосьедад" 1:0

Асьер Гаритано шогирдлари ЛаЛиганинг 18-турида "Реал Сосьедад"ни қабул қилишди. Тенг курашлар остида ўтган баҳсда мезбонлар ғалабага эришишди. Баҳс тақдирини 75-дақиқада Габриэль томонидан киритилган гол ҳал қилди. Ушбу муваффақиятдан сўнг "Леганес" турнир жадвалининг 9-ўрнига кўтарилди.

"Барселона" - "Леванте" 3:0

160 млн. еврога Филиппе Коутиньони харид қилган "Барселона" ўзининг 23та учрашувлик мағлубиятсиз сериясини 24тага етказиб қўйди. Бу сафар Каталония клубининг қурбони "Леванте" бўлди. Марк-Андре тер Штегеннинг ишончли ўйини Мессининг голи ва голли паси баҳс йирик ҳисобда якунланишини таъминлади. Паулиньо ушбу учрашувда ўзининг ЛаЛигадаги 7-голини урди. Каталонияликлар кучайишда давом этмоқда.

"Вильярреал" - "Депортиво" 1:1

Кўпчилик ғалабасини тахмин қилган "Вильярреал" умидларни оқлай олмади. 30-дақиқада Энес Унал "сариқ сувости кемаси"ни ҳисобда олдинга олиб чиқди. "Депортиво" иккинчи бўлим охирида узоқ кутилган ҳужумни амалга оширди. Сиднейдан тўпни қабул қилган Флорин Андоне дарвозани аниқ нишонга олди ва жамоасига бир очко совға қилди.

"Атлетик" - "Алавес" 2:0

17та учрашувда дуранг ўйнамаган "Алавес" ЛаЛиганинг 18-турида ҳам рақиб билан муроса кўчасини танламади - мағлубиятга учради. "Атлетик" сафида Хабьер Эчеита ва Ариц Адурис ўз ҳисобига гол ёздириб қўйишди ва ўйин мезбонларнинг ишончли ғалабаси билан якунланди.

"Сельта" - "Реал" 2:2

Кубок учрашувида "Барселона" билан дуранг ўйнаган "Сельта" ЛаЛигада "Реал" билан ҳам "дўст тутинди". Голларга бой ўтиши тахмин қилинган учрашув кутилганидек ўтди. 33-дақиқада Даниэль Васс мезбонларни ҳисобда олдинга олиб чиқди, "Реал" ярим ҳимоячиси Гарет Бэйл эса 36 ва 38-дақиқаларда иккида гол уриб, "Сельта"ни ҳавотирга солиб қўйди. 71-дақиқада Кейлор Навас Япо Аспасни йиқитиб, мезонларга пенальти тепиш учун имконият яратди. Бироқ Аспас 11 метрлик жарима зарбасини голга айлантира олмади. Шунга қарамай ҳужумларни тўхтатмаган "Сельта" ўз мақсадига эришди. 82-дақиқада биринчи гол муаллифи Вассдан тўпни қабул қлган Максимилиано Гомес Навас дарвозасини ишғол қилди ва баҳс 2:2 ҳисобида якунланди. Зинедин Зиданнинг ЛаЛигадаги ишлари борган сари ёмонлашмоқда. 18-турдан сўнг "қаймоқранглилар" турнир жадвалининг 4-ўрнини эгаллаб туришибди.

"Малага" - "Эспаньол" 0:1

18-турнинг сўнгги учрашуви душанба куни бўлиб ўтди. Хосе Мигель Гонсалес ва Кике Флорес жамоалари ўртасидаги баҳсда меҳмонлар уч очко билан уйга қайтишди. 6-дақиқада Серхи Дардер томонидан урилган гол Каталония клубига 3 очко тақдим этди. Ушбу ғалабадан сўнг "Эспаньол" турнир жадвалида 14-ўринни эгаллаб турибди.

Диего Коста қизил карточка олган турда "Реал" 1 очко ишлади, "Барселона" эса Дембеле билан йирик ғалабага эришди (тур шарҳи)