Aniqrog'i, Dilshod Nuraliev boshqaruvidagi U-17 o'smirlar terma jamoamiz hozirda Dukentda mashg'ulot o'tkazmoqda. Ushbu yig'inning qay saviyada o'tayotgani va umuman, U-17 o'smirlar terma jamoamizdagi yangiliklarni bilish maqsadida bosh murabbiy bilan suhbatlashdik.

- 12 sentyabr kuni nomzodlarni Dukentda yig'dik va hozircha shu erda kuni ikki mahaldan mashg'ulot o'tkazyapmiz – deya gap boshladi Nuraliev. - Ertalabki mashg'ulotlar yigitlarning jismoniy tayyorgarligini oshirishga qaratilib, asosan yugurish va trenajyor zalida mashqlar o'tkazyapmiz. Tushlikdan keyingi mashg'ulotlarda esa to'p bilan ishlayapmiz. Bugungi kunda tarkibda 23 nafar futbolchi bor. Quvonarlisi terma jamoaning etakchi o'yinchilari Doston Hamdamov, Ilhom Abdug'aniev jarohatlardan forig' bo'lib, yana safga qaytdi.

- Shu oyning boshida Avstriyada yig'in o'tkazib kelgan U-17 o'smirlar terma jamoamizning bu galgi yig'inida, yangi nomzodlar ham bor bo'lsa kerak?

- Albatta, bu safargi mashg'ulotlarimizda yana bir qator yangi nomzodlarni ko'zdan kechirmoqdamiz. Sanjar Qodirqulov, Adham Ahmadjonov, Alisher Mirzaev kabi klubida o'zini ko'rsatishga erishayotgan o'yinchilarni ham taklif etganmiz.

- Ish bor joyda kamchilik ham bo'ladi. Aytingchi bugungi kunda qaysi chiziqlar sizni havotirga solmoqda?

- O'z imkoniyatimizdan kelib chiqib ishlamoqdamiz. Bir so'z bilan aytganda, ixtiyorimizdagi o'yinchilarni taklif etganmiz.

- Ushbu yig'in davomida o'rtoqlik uchrashuvlari ham tashkil etiladimi?

- Ha, albatta. Bugun, ikkinchi liga vakili “Angren” jamoasi bilan o'ynaymiz. 24 sentyabr kuni esa “Olmaliq” bilan kuch sinashamiz. Bu jamoaga asosiy tarkibi bilan o'ynash taklifi bilan chiqgandik. Bilmadim, endi qaysi tarkibini o'ynatarkin.

- Kelgusi rejalar qanday?

- 24 sentyabr kuni Dukentdagi yig'inni yakunlaymiz. Shundan so'ng yigitlarga malum muddatlik tanaffus beramiz. 27 sentyabr kuni esa yana Toshkentda yig'ilib, shu kunning o'zida Ispaniyaga jo'nab ketamiz. Oldimizda Ispaniya yig'ini turibdi. U erda 10 kun bo'lamiz. Xorij yig'ini davomida uchta sinov-nazorat bahsini o'tkazishni rejalashtirganmiz. Sparring raqiblarimizning kim ekanligi borasida, hozircha aniq malumot bera olmayman.

Islombek Rustambekov suhbatlashdi.

Dilshod Nuraliev: “Oldimizda Ispaniya yig'ini ham turibdi”