Chorshanba kungi uchrashuvda Pro-Liga vakili “Dinamo” Superliga ishtirokchisi “Qizilqum” bilan chorak final yo'llanmasi uchun kurashadi.

BIR UCHRASHUVDAN IBORAT BAHS

“Dinamo” va “Qizilqum” jamoalari joriy yilda ikki xil saviyadagi alohida turnirlarda ishtirok etishayotgan bo'lishsada, O'zbekiston Kubogi nimchorak finali doirasida har ikki jamoa ham faqat g'alaba uchun maydonga tushadi. Sababi, 1/8 final doirasidagi bahs taqdiri bitta o'yindan iborat va jamoalar durang o'ynagan taqdirda, dastlab qo'shimcha bo'limlar, keyin esa penaltilar seriyasi o'tkazilishi mumkin.

JORIY MAVSUMDA: KIMDA QANDAY NATIJA?

"DINAMO"
Pro-Liga “A” guruhida ishtirok etayotgan “Dinamo” jamoasi mavsumni kutilgandek boshlamadi. Ketma-ket muvaffaqiyatsizliklar natijasida jamoa turnir jadvalida 7-pog'onadan joy olgan. So'nggi turda Nukusning “Orol” klubini qabul qilgan Davron Fayziev shogirdlari chempionatdagi ilk g'alabani qo'lga kiritshdi.

Dinamoning so'nggi besh turdagi natijasi:
7-tur: Dinamo – Sho'rtan - 0:0
8-tur: Orol – Dinamo - 2:1
9-tur: Dinamo – Andijon - 1:1
10-tur: Andijon – Dinamo - 3:1
11-tur: Dinamo – Orol - 2:0

"QIZILQUM"
Hamid Aktamov qo'l ostidagi “Qizilqum” jamoasi esa so'nggi ikkita turda muvaffaqiyatli natijalarga erisha oldi. Dastlab, Navoiy jamoasi Toshkentda amaldagi chempion “Lokomotiv” bilan o'yindan ochko bilan qaytgan bo'lsa, so'ngi turda Qo'qondan g'alaba bilan qaytdi. “Qizilqum” ayni damda Superligada 10-pog'onadan o'rin olgan.

Qizilqumning so'nggi besh turdagi natijasi:
9-tur: Qizilqum – AGMK – 3:0
10-tur: Qizilqum – Metallurg – 1:2
11-tur: Navbahor – Qizilqum – 3:0
12-tur: Lokomotiv – Qizilqum – 2:2
13-tur: Qo'qon-1912 – Qizilqum – 0:1

O'ZARO O'YINLAR: 35-TO'QNASHUV

Bu ikki klub chempionat bahslarida 34 bora to'qnash kelgan. Ushbu o'yinlardan 15 tasida navoiyliklar g'olib bo'lishgan. 9 o'yin durang hisobda yakunlangan. “Dinamo” shu kunga qadar “Qizilqum”ni 10 marta mag'lubiyatga uchrata olgan.

“Dinamo” o'yinlarda 43 ta gol urgan va 43 ta o'tkazib yuborgan. Ochko ishlash borasida “Qizilqum” o'zaro o'yinlarda 54 ochko olgan, Dinamo esa 39 ochko. “Qizilqum”ning Oliy ligada “Dinamo” ustidan erishgan eng yirik g'alabasi 3:1 ni tashkil qiladi. “Dinamo”ning esa navoiyliklar ustidan qozongan eng yirik g'alabasi – 6:1 ga teng.

“Dinamo” Samarqandda bu raqibni 9 marta taslim qilgan. Faqat 5 ta bahsda durang qayd etilgan. “Qizilqum” safardan 3 marta g'alaba bilan qaytgan.

Samarqandda o'tgan o'zaro so'nggi 8 uchrashuv:
26.05.2017 Dinamo - Qizilqum 0:1
17.05.2015 Dinamo - Qizilqum 2:2
12.09.2014 Dinamo - Qizilqum 2:1
04.08.2013 Dinamo - Qizilqum 1:0
27.09.2012 Dinamo - Qizilqum 3:0
21.08.2011 Dinamo - Qizilqum 1:1
01.05.2010 Dinamo - Qizilqum 0:0
25.06.2009 Dinamo - Qizilqum 3:0

O'YINNI KIM BOSHQARADI?

O'zbekiston Kubogi 1/8 final doirasidagi o'yinlarni boshqarib boradigan hakamlar ro'yxati elon qilingan.

30 may (chorshanba)
“Dinamo” – “Qizilqum”
Hakamlar: A. Ergashev, X.Shodmonov, T. Gaynullin, K. Rasulov.
Nazoratchi – A.Xotamov.
Komissar – R.Chernikov.

O'YIN “SPORT” TV ORQALI NAMOYISH ETILADI
Nimchorak final doirasidagi “Dinamo” – “Qizilqum” bahsi “Sport” telekanali orqali 30 may, soat 17:00dan boshlab to'g'ridan-to'g'ri efirda Samarqanddagi “Dinamo” stadionidan olib ko'rsatiladi.

O'zbekiston Kubogi.
1/8 final.
30 may (chorshanba)
“DINAMO” – “QIZILQUM”
O'yin boshlanish vaqti: 17:00
TV-translyaciya: Sport TV (jonli efir).

“Dinamo” klubi matbuot xizmati.

Dinamo - Qizilqum: Kim chorak finalga chiqadi?