Yangi futbol mavsumi starti oldidan o'tkazilishi anana tusini olgan tanishtiruv marosimida Dinamo futbol jamoasining bu yilgi yangi tarkibi tanishtirildi. Samarqand shahridagi Ipak yo'li turizm xalqaro universiteti katta zalida o'tgan tadbirda viloyat hokimligi, klub va mutasaddi rahbarlar va 200 nafarga yaqin eng faol muxlislar hamda OAV vakillari ishtirok etdi.

Taqdimot marosimini Samarqand viloyati hokimi o'rinbosari Rustam Qobilov ochib berib, Dinamo jamoasi bu yil muxlislarni xursand etib, Superligaga qaytishi lozimligini takidlab, klubga bu mashaqqatli vazifani bajarishda omad va zafar tiladi.

Muxlislarning qarsaklari ostida birin-ketin Dinamo jamoasining barcha 26 futbolchisi tanishtirilib, ularga yangi liboslar topshirildi. O'yinchilarning 15 nafari yangi, 11 nafari esa o'tgan yilgi tarkib azolaridir.

Shundan keyin jamoa bosh murabbiyi Vadim Abramov sahnaga chiqib, Dinamo oldiga Superliga vazifasi turgani, Samarqanddek shahar jamoasi yuqori o'rinlarda bo'lishga munosibligini aytdi. Jamoa sardori Erkin Baydullaev ham futbolchilar nomidan so'zga chiqib, eng avvalo samarqandlik muxlislarni xursand etish uchun barcha bor imkoniyatini ishga solishini bildirdi. Shuningdek, legionerlardan ganalik Derrik Mensah va Kojo Joel ham muxlislar oldiga chiqib, ishonchni oqlashga harakat qilishlarini aytishdi.

Fan-klub etakchisi Shavkat Burhonov, jonkuyar muxlislar ham so'zga chiqib, Dinamoning Superligaga qaytishi uchun elkama-elka turib, qo'llab-quvvatlashga tayyor ekanliklari haqida gapirishdi.

Ochiq savol-javob va yuqori kayfiyatda o'tgan tadbir yakunida faol va faxriy muxlislar o'z takliflarini viloyat hokimi o'rinbosari Rustam Qobilovga bildirib, ijobiy javob olishdi. Xususan, Pro liga 1-tur o'yini doirasida 16 mart kungi Muborakdagi Mashalga qarshi safardagi o'yinga borib kelish uchun faol va faxriy muxlislar uchun avtobus ajratiladigan bo'ldi. Stadiondagi sharoitlar masalasi ham o'rganilishi malum qilindi.

“Dinamo” yangi mavsum oldidan tanishtiruv marosimini o'tkazdi