- Diyor aka, avvalo bugungi uchrashuv borasida fikrlaringiz bilan o'rtoqlashsangiz?

- Bugun ochiq futbol bo'ldi. Har ikkala jamoada gol urish uchun ko'plab vaziyatlar yuzaga keldi. Biz havotir olgan holatda gol o'tkazib yubordik. Aytaylik, ikkinchi bo'lim oxirlarida Abdurahmon Abdulhaqovda qulay holat bo'ldi, u foydalana olganida natija boshqacha bo'lishi mumkin edi. Bizda bosim bor bo'lib, g'alaba qozona olsak, 5-o'rinni qo'lga kiritish uchun imkoniyatimiz oshardi. Shunday bo'lsada, jamoamiz futbolchilariga rahmat aytaman. Ular oxirigacha kurashdik, lekin tajriba o'z so'zini aytdi. “Turon”da baribir tajribali futbolchilar bor, bu esa o'yinda yaqqol sezilib qoldi. Ming afsuski, kuchli beshtalikka kira olmadik, qo'yilgan vazifani bajara olmadik. Hayot davom etadi. Biz esa ishlashda davom etamiz.

- Siz Farg'ona jamoalariga qarshi o'ynaganda o'zingizni qanday his qilasiz?

- O'zi asli farg'onalikman. Lekin 2017 yildan beri asosan boshqa viloyat klublarida ishlamoqdaman. Mana masalan “Andijon”, “Mashal” va hozirda “Yangier” klubida ishlamoqdaman. Bunday jamoalarga qarshi bahsda natija qilishni istaysiz. Lekin futboda harakatning o'zi kamlik qiladi. Oldinda muammolarimiz ko'p. Vaziyatlar bo'lyapti, lekin gol urolmayapmiz. “Yangier” ham “Turon” kabi yosh jamoa hisoblanadi. Imkon qadar mavsumni yaxshi o'rinlarning birida tugatishga harakat qilamiz.

- Said Abdujabbarovning zaxirada qoldirilganiga nima sabab bo'ldi?

- Bilasizmi, avvalgi turda “Xorazm”ga qarshi bellashuvda jamoaning ikki nafar asosiy yarim himoyachilari o'ynamagandi. Jumladan, Said Abdujabbarov sariq kartochkalari soni 4taga etgani sababli, o'tkazib yuborgandi. Bu o'yinga qadar 4 kun jamoa bilan mashg'ulot o'tkazgandi. Ko'p vaqt mashg'ulot o'tkazmagani sabab zaxirada qoldirildi.

- Bugun jamoangiz futbolchilari hakamlarga ko'p marotaba etiroz bildirdi. Bunga fikringiz?

- O'zimiz ham vaqtida futbol o'ynaganmiz. O'yin vaqtida hissiyotga berilamiz. Qaerdadir hakam to'g'ri qarorini noto'g'ri qabul qilishgandir. Lekin o'yindan keyin video takrorni ko'rib, o'zlari xato fikrga kelganini bilishadi. Deylik, o'yin oldidan yigitlar, bu biz uchun so'nggi imkoniyat, g'alaba qozonishimiz kerak deb takidlagandim. Balki shu sabab biroz ehtiyoroslarga berilgandir.

- Superligaga chiqish uchun qaysi jamoalarning imkoniyatini yuqori baholaysiz?

- Menimcha, “Andijon” yaqqol favorit hisoblanadi. Men “Yangier”ga murabbiy sifatida tayinlanganimdan so'ng yuqoridagi jamoalarga qarshi o'ynab chiqdik. Nazarimda, “Andijon” boshqalardan ancha kuchli ko'rinmoqda.

- Sobiq jamoangiz “Mashal”ning imkoniyatiga qanday fikrdasiz?

- “Turon” bugun g'alaba qozonib, “Mashal”dan yanada ilgarilab ketdi. Ertaga “Mashal” o'z maydonida “Andijon”dan ustun kelsa, keyingi bosqichdagi imkoniyatini yanada yaxshilab olishi mumkin.

Diyor Mirzaboev: “Hayot davom etadi. Ishlashda davom etishimiz kerak”