O'zbekiston terma jamoasi 2-turni safarda Qirg'iz Respublikasiga qarshi o'tkazadi. O'yin Bishkekdagi Dolen Omurzakov nomli stadionda bo'lib o'tadi hamda 19:00da boshlanadi.

Bishkekdagi stadionga Dolen Omurzakov nomi berilgan. Shu o'rinda savol tug'ilishi mumkin: Dolen Omurzakov kim bo'lgan va nima uchun stadionga shu kishining nomi berilgan?

Malumot uchun, Dolen Omurzakovich Omurzakov Qirg'iz Respublikasi sport qo'mitasining birinchi rahbari hisoblanadi. Dolen Omurzakov etim o'sgan, uning qaysi sanada tug'ilgani hujjatlarda aniq qayd etilmagan. Shu bois 22 aprel deb yozib qo'ya qolishgan. Dolen Omurzakov yoshligidan sportga qiziqqan, avvaliga gimnastika, keyin esa boks bilan astoydil shug'ullangan. Oradan vaqt o'tib Lenin nomidagi jismoniya tarbiya va sport institutida tahsil olgan.

Oliygohda o'qib yurgan kezlari jismoniya tarbiya o'qituvchisi bo'lishni niyat qilgan Omurzakov keyinchalik aspiranturada tahsil oldi. 50-yillarda u Davlat qo'mitasining jismoniya tarbiya va sport bo'limi rahbarlik lavozimida ishlab, mamlakatda sport rivojiga katta hissa qo'shdi. Buning uchun Dolen Omurzakov 25 yil umrini sarfladi. Omurzakov sportga rahbarlik qilgan yillari Kojomkul nomidagi sport saroyi qurib bitkazildi, "Spartak" stadioni qayta tamirdan chiqarildi. Shuningdek, otchopar maydoni, tog'li hududda chang'i sport turi qarorgohi hamda alpinistlar uchun "Ala Archa" lageri qad rostladi. Bundan tashqari viloyat markazlarida sport maktablari tashkil etilib, yuzlab sportchilar tahsil ola boshladi.

Sport rivojiga qo'shgan hissasi uchun Dolen Omurzakov bir necha bor hukumat tomonidan taqdirlangan. Aynan uning say-harakatlari sabab Qirg'iz Respublikasi sportchilari spartakiada va Moskvada bo'lib o'tgan olimpiya o'yinlarida ishtirok etishga muvaffaq bo'ldi. O'sha vaqt 5 nafar qirg'iz sportchisining oltin medallarni qo'lga kiritishi mamlakat uchun katta voqea bo'lgandi.

Bir so'z bilan aytganda Dolen Omurzakov qirg'iz sportiga ulkan hissa qo'shgan shaxs bo'lgan. Shuning uchun Bishkekdagi markaziy stadionga uning nomi berilgan. 1989 yil vafot etgan sport tashabbuskori umrining oxirigacha mehrini sport rivojiga berdi, hatto nafaqaga chiqqan yillari ham turli sport tadbirlariga kelishni kanda qilmadi va shu orqali ko'plab murabbiylar bilan muloqotda bo'lib, xalq mehrini qozondi.

X.Xoliqov

Dolen Omurzakov kim bo'lgan?