Bayram arafasida siz azizlarni zeriktirib qo'ymaslik maqsadida yana bir maqolani etiboringizga havola qilishni lozim topdik. Quyida 2021 yilda o'z jamoasining eng yaxshi futbolchisi bo'lganlarning keltirib o'tamiz. Albatta bu bizning fikrimiz. Har kimning qarashi turlicha.

"Paxtakor": Dragan Cheran

2021 yildagi statistikasi: 23ta o'yin, 16ta gol, 4ta assist

Sovrinlari: O'zbekiston Superkubogi g'olibi, Superligada chempionlik, 2021 yilgi Superliga ramziy terma jamoasidan joy oldi

Buni qarangki 2021 yilda ham Dragan Cheran avvalgi mavsumlarda bo'lgani kabi jamoasining etakchisi bo'la oldi. Superligada esa qatorasiga uchinchi bor to'purarlik hislatini namoyish qildi. Serbiyalik futbolchi "Paxtakor"ning muhim figuralaridan biri hisoblanadi. Jamoa o'yini aynan uning atrofida quriladi, desak mubolag'a bo'lmaydi. U maydonga tushmagan aksariyat o'yinlarda jamoasi mag'lubiyatga uchradi. O'zbekiston kubogi finali bunga yaqqol misol, deya olamiz.

Davogarlar: Farrux Sayfiev, Xojimat Erkinov

"So'g'diyona": Shoxruz Norxonov

2021 yildagi statistikasi: 25ta o'yin, 10ta gol, 3ta assist

Sovrinlari: Superligada kumush medal sohibi, 2021 yilgi Superliga ramziy terma jamoasiga kiritildi

Mavsum davomida Ulug'bek Baqoev murabbiyligidagi "So'g'diyona" jamoasining namoyish qilgan o'yini ko'p tanqidga uchradi. Lekin yakunda uning shogirdlari barchaga buning noto'g'ri ekanligini kumush medal bilan isbotlay olishdi. Bu yil jizzaxliklar ko'p gol urishmadi, asosiy etiborni natijaga qaratishdi. Jamoaning Superligadagi 28ta golidan 10tasiga xujumchi Shohruz Norxonov mualliflik qildi. Shuningdek 3ta golga assistentlikni amalga oshirdi. Demak "So'g'diyona"ning 2021 yildagi eng yaxshi futbolchisi Shoxruz Norxonov.

Davogarlar: Milan Mitrovich, Luka Chermel

AGMK: Sanjar Tursunov

2021 yildagi statistikasi: 25ta o'yin, 5ta gol, 1ta assist

Sovrinlari: Superligada bronza medel sohibi, yil ramziy terma jamoasi azosi

Gapning ochig'i AGMK jamoasida aynan 2021 yilda hech kim ajralib turgani yo'q. Mirjalol Qosimov qo'l ostida ikkita teng kuchli tarkib shakllangan. Jamoada barcha bir-birini o'rnini to'ldirishga qodir. Shunga qaramay nisbatan nomzod sifatida Sanjar Tursunovni tanladik. Maydon markazida etakchilikni qo'liga olgan, xujumlarni boshlashda faollik ko'rsatgan yarim himoyachi yil yakunidagi taqdirlash marosimida joriy yilning ramziy terma jamoasiga jalb qilindi. Statistikasi esa yuqorida ko'rsatilgan.

Davogarlar: yo'q

"Nasaf": Xusayn Norchaev

2021 yildagi statistikasi: 26ta o'yin, 13ta gol, 2ta assist

Sovrinlari: O'zbekiston kubogi sohibi, Superliganing eng yaxshi futbolchisi, "yosh yulduz" sovrini, OFK kubogi to'purari

So'zsiz "Nasaf"ning o'tgan mavsumdagi eng yaxshi futbolchisi Xusayin Norchaev bo'ldi. Bunga esa tepada keltirilgan faktlarning o'zi etarli, deb bilamiz. 2020 yilda katta futbolda debyut qilgan xujumchi oradan bir yil o'tib shunday katta yutuqlarga erishdi. O'ylaymizki, u bu bilan to'xtab qolmaydi va o'sishda davom etadi.

Davogarlar: Marko Stanoevich, Sherzod Nasrullaev

"Bunyodkor": Xurshid G'iyosov

2021 yildagi statistikasi: 25ta o'yin, 9ta gol, 4ta assist

So'nggi yillarda qanotda etakchilikni qo'liga olayotgan Xurshid G'iyosov bu mavsumda "Bunyodkor"ning eng yaxshi futbolchisi bo'la oldi. Agarda Farrux Ikromov mavsum o'rtasida jarohat olmaganida, balki uni etirof qilayotgan bo'lishimiz mumkin edi. Ikki qanotda, zarur pallada hujum chizig'ida ham shay holatda bo'ladigan yarim himoyachi endilikda AGMK safini to'ldirishi kutilmoqda.

Davogarlar: Lutfulla To'raev, Farrux Ikromov

"Navbahor": O'tkir Yusupov

2021 yildagi statistikasi: 26ta uchrashuv, 12ta quruq o'yin

Superliga-2021 ramziy terma jamoasiga kiritildi

O'tkir Yusupov bu mavsumda "Navbahor"ning haqiqiy qalqoniga aylandi, desak yanglishmaymiz. Aksariyat bahslarda u jamoasini o'ta muqarrar gollardan qutqarib qoldi. U bunda "So'g'diyona" posboni Milan Mitrovich bilan deyarli bir xil natija qayd etdi (19ta uchrashuv, 12ta quruq bahs). Qilgan mehnatlari esa samarasiz ketmadi, ko'pchilik kutganidek Srechko Katanec uni oktyabr va noyabr oyidagi yig'inlarga taklif qildi. Gruziya bilan bahsda esa asosiy tarkibda ishonch bildirdi. O'tkir Yusupov terma jamoaning Yaponiya bilan o'yiniga ham jalb etildi.

"Lokomotiv": Aziz Amonov

2021 yilgi statistikasi: 26ta o'yin, 8ta gol, 4ta assist

Superliga-2021 ramziy terma jamoasiga kiritildi

Mikael Sekeyra "Lokomotiv"dagi bir mavsumlik faoliyati davomida bizga Aziz Amonovni qayta kashf qilib berdi. Aslida ushbu futbolchini avvaldan beri yaxshi bilamiz. Lekin bu qadar yorqin to'p tepganini eslay olmaymiz. Fikrimizcha o'zi uchun ham bu yil yaxshi mavsum o'tkazdi. Terma jamoa murabbiylarining nazariga tushdi. Yakunda Superliganing ramziy terma jamoasidan o'rin egalladi.

Davogarlar: Diyor Turopov, G'ulom-Haydar G'ulomov

Sizning fikringiz qanday? Tez fursatlarda maqolamizning ikkinchi qismini mutolaa qilasiz.

Dragan Cheran, O'tkir Yusupov yoxud 2021 yilda o'z jamoasining eng yaxshisi bo'lgan 14 futbolchi (1-qism)