"Наполи" - "Салернитана"

Бу учрашувда "Наполи"га жароҳатдан тикланиш жараёнини давом эттираётган Политано, Руй ва Симеоне ёрдам бера олмайди. Клуб бу учрашувда скудеттони расман қўлга киритиши мумкин. Шундай экан Спаллетти таркибда жуда кескин экспериментлар қилмаса керак. Осимхен ва Кварацхелия сафда, демак, уларни асосий таркибда кутишимиз мумкин.

Маджоре ва Фацио ўйинга тайёр бўлиб улгуришмаяпти, шу сабабли Пауло Соуза ҳимоя маркази борасида бош қотиришига тўғри келади. Ҳужумда Кастанос-Диа жуфтлигига умид билдирилади. Яна бир қизиқ томони Кастанос аввалги баҳсда ҳужумчи ортида қандай ҳаракат қилиши синаб кўрилди.

Биринчи даврада "Наполи" сафарда бўлишига қарамай, ишончли тарзда ғалаба қозонган (2-0). Табиийки, бу сафар ҳам неаполликлар яққол фаворит. Ҳа, "Салернитана" яхши ўйин кўрсатмоқда ва анча кучайган, бироқ чемпионликни уйида қўлга киритиши мумкин бўлиб турган "Наполи"га кучи етмаса керак.

"Рома" - "Милан"

Бурни сингани туфайли Карсдорп ўйинни ўтказиб юбориши аниқ. Бироқ Жозе Моуриньонинг бу сиз ҳам боши қотган. Смоллинг, Льоренте, Дибала ва Вейналдум ҳам бу баҳсда катта эҳтимол жамоага ёрдам бера олмайди. Ҳар бир чизиқда қандайдир янгилик қилиш талаб этилади.

Пиоли учун Калабриянинг дисквалификациядан қайтиши ажойиб янгилик. Аммо Побега эса жароҳат сабаб майдонга туша олмайди. Куни-кеча машғулотда ўзини ёмон ҳис қилган Жирунинг жароҳати жиддий бўлиб чиқмади. Шунинг учун, француз ҳужумда Леао билан бирга майдонга тушиши деярли аниқ.

Ўтган сафар жамоаларнинг ёрқин тўқнашуви 2-2 ҳисобида дуранг билан якунланганди. Ҳозир "Рома" кичик устунлик билан бўлсада фаворит. Мутахассисларнинг фикрига кўра, бу тўқнашувда мезбон фактори муҳим роль ўйнайди. Нима бўлганда ҳам "Милан" ва "Рома" беллашуви зерикарли бўлмаслиги аниқ.

"Интер" - "Лацио"

Лукаку асосий таркибга қайтади ва Лаутаро билан жуфтлик ҳосил қилади. "Интер"да Шкриньярдан бошқа йўқотишлар йўқ. Шундай экан, Инзаги футболчиларнинг жисмоний ҳолатидан келиб чиқиб танлов қилиши мумкин. Ахир жаома 3 та фронтда курашни давом эттирмоқда. Қизиғи, "Лацио"да ҳам йўқотишлар йўқ. Козале ва Катальди дисквалификациядан қайтади, Иммобиле эса ўйинни илк дақиқалардан бошлашга тайёр. Унга ҳужумда Фелипе Андерсон ва Цаканья ёрдам беради.

"Лацио" биринчи даврада "Интер"ни барча жабҳада мағлуб этганди. Аммо бу сафар мутахассислар "бургутлар"га умуман ишонишмаяпти. Чиндан "Торино"га қарши баҳс кўнгилдагидек чиқмади, сафарда эса римликларга янада қийинроқ бўлади. Бироқ "Интер"нинг тиғиз тақвимини инобатга олиб, "нерадзурри"га ҳам осон бўлади деб бўлмайди.

"Болонья" - "Ювентус"

Тиаго Моттанинг таркиб билан боғлиқ муаммолари анча кўпайиб кетди. Арнаутович, Баньонили, Камбьясо ва Сориано бу турда жамоага ёрдам бера олмайди. Ҳужум чизиғида Сансоне-Бэрроу жуфтлигига альтернатив вариантнинг ўзи йўқ. Марказий ярим ҳимоячи ролида эса Шоутенни кўрамиз.

"Ювентус"да Влахович ва Мойзе Кин сўроқ остида, шунингдек чоршанба куни ўйнаган Бонуччи якшанба куни яна бир баҳсда иштирок этолмаса керак. Шундай экан ҳимоя марказида Бремер билан Гатти жуфтлик ҳосил қилади. Ҳужумда Аллегри Аркадиуш Миликка ишонч билдиради.

"Ювентус" "Болонья"ни биринчи даврада мағлубиятга учратган. Бироқ ҳозир жамоаларнинг ҳолатидан келиб чиқиб, кимгадир яққол устунлик бериб бўлмайди. "Кекса синьора" қоғозда фаворит, лекин "Болонья" шу мавсумда ҳам катта клубларга қаршилик қила олишини исботлаб қўйди.

Сергей Румянцев

Нозима Тўхтамирзаева таржимаси

ЕЧЛ йўлланмаси учун кураш: А Серия 32-тур превьюси