“Mashal” bilan o'yin haqida

“O'yin juda qiziqarli bo'ldi. Biz ushbu uchrashuvga juda yaxshi tayyorgarlik ko'rgandik. Chunki Muborakdagi bahsda g'alaba qozonmasak bo'lmasdi. Xudoga shukurki, qilgan tayyorgarligimiz o'z mevasini berib, muhim bo'lgan yutuqni qo'lga kiritdik"

Raqib jamoasi to'g'risida

“Bu jamoa doimo ko'plarga qiyinchilik tug'diradi. Hozirda muborakliklar yaxshi formadagilini ham bilardik. Shuni hisobga olib, o'yinga ruhan va taktik tomonlama ham juda yaxshi tayyorgarlik ko'rdik. Omad ham biz tomonda bo'ldi. Yigitlar oxirigacha irodali va matonatli o'yin ko'rsatishdi. Chunki “Mashal” mag'lubiyatga uchrayotgani tufayli, bor kuchlari bilan oldinga o'tishdi. Jamoamiz esa to'g'ri taktika asosida o'yin ko'rsatgani g'alabamizga sabab bo'ldi.

“Andijon”ning barqaror o'yin ko'rsata olmayotgani xususida

“Xabaringiz bor, birinchi davradan keyin jamoada o'zgarishlar ko'p bo'ldi. Hujum va yarim himoyada o'ynagan muhim bo'lgan besh nafar futbolchi “Andijon”ni tark etdi. Tarkib deyarli yangilandi va ancha yoshartirildi. O'yin uslubimizni bir maromga keltirib olishimiz biroz vaqt kerak. O'ylaymanki, hammasi joyiga tushadi. Barqaror o'yin ko'rsatishni boshlaymiz degan umiddaman".

Superligada qolish vazifasi borasida

“Barchasi Yaratgandan. Agar biz aniq taktika asosida o'yin ko'rsatadigan bo'lsak, imkoniyatlardan foydalana olsak, albatta Superligada qolishni uddalay olamiz. “Andijon” muxlislari bizni qo'llab-quvvatlamoqda. Natijalarimiz bilan ularni xursand qilish niyatidamiz",- deydi Eldor Adhamov.

Eldor Adhamov: “Muborakda muhim bo'lgan yutuqni qo'lga kiritdik”