Biz esa ushbu uchrashuvdan so'ng joriy mavsumda jamoa tarkibida ajoyib o'yinlari bilan muxlislar etiboriga tushgan Eldor Ergashevni suhbatga chorladik.

- Eldor avvalo o'yin haqida qisqacha fikrlaringiz bilan o'rtoqlashsangiz, qiyin o'yinda so'nggi soniyalarda urilgan gol "Neftchi"ga g'alaba keltirdi...

- O'z maydonimizda, muxlislar qarshisida g'alaba qozonish har doim maroqli va yoqimli. G'alabamizda muxlislarimizning qo'llab-quvvatlagani bizga foyda berdi. Ob-havo sovuqligiga qaramasdan stadionga ko'plab ishqibozlar tashrif buyurishdi.

- Qolgan ikki uchrashuvni hisobga olganda "Neftchi"ni Superligaga yo'llanma oldi deya olamizmi?

- Har bir o'yinda g'alaba uchun maydonga chiqamiz. Biz hali Superligaga chiqmadik.

- Pro ligada mavsum poyoniga etmoqda. O'zingiz uchun bu yil nima kashf qildigiz?

- O'tgan mavsum himoyada ko'proq to'p tepdim. Bu mavsum esa oldingi chiziq, yarim himoyada harakat qilmoqdaman. Qaysi poziciyada o'ynashimdan qatiy nazar jamoamga foydam tegsa bo'lgani. Shuningdek bu yil gollarimni hisobini ochib oldim, ko'proq gol urishga harakat qildim.

- Sizdagi nostandart harakatlar, uzoqdan kutilmagan zarbalar, tashqi ko'rinishingizdan Aleksandr Geynrixga o'xshatayotganlar ham bor. Sizni bunga munosabatingiz qanday?

- Kutilmagan zarbalar murabbiylarimizning ko'rsatmalaridir. O'yinlarim muxlislarga yoqayotganidan xursandman. Aleksandr Geynrixga o'xshatishayotganligi esa yoqimli albatta.

- "Neftchi" uchun shu kunga qadar o'tgan eng qiyin o'yin qaysi?

- Biz uchun hech bir bahs oson o'tayotgani yo'q. Bu borada kimnidir ajratib ko'rsatmoqchi emasman.

- Pro liga 2020 yilgi mavsumda yangi darajaga chiqdi deb hisoblaysizmi?

- Albatta Pro ligada yaxshi tomonga o'zgarishlar bo'lmoqda. Barcha jamoalar oldiga yuqori maqsadlarni qo'ygan.

Abdulaziz Iskandarov yozib oldi

Eldor Ergashev: "Neftchi" hali Superligada emas. Pro ligada esa yaxshi tomonga o'zgarishlar bo'lmoqda"